【異動空間】商品吼落後三寶 - 魏力

更新時間 (HKT): 2021.05.14 02:00
■全球疫情反覆,復蘇注定好慢好慢,商品價格有權再爆一段,相對落後的油金銀可睇高一線。資料圖片

美國4月核心CPI已飆到3%,遠高於預期的2.3%,聯儲局話「不用怕,只是暫時現象」,準備讓通脹再飛一會。儲局信心滿滿,相信有兩個考慮因素:一、3月份向市民派錢,位位1,400美元,谷高消費屬一次性現象;二、物價飛漲是由於供應鏈問題,下半年搞番掂就無事。

不過,上星期美國財長耶倫唔小心「講多咗」,話要小心放水幾萬億後經濟過熱,可能要加息壓通脹。佢可能忘記咗自己唔再係聯儲局舵手,加息言論並不恰當,所以要立刻澄清。但魏力看來,倫姨只係將心嗰句講出嚟,就係隨時要準備收水(甚至加息)。當然,加息太快會扼殺經濟復蘇,分分鐘通脹變通縮;太遲加息就變滯脹,兩條路對股市都係大鑊,如何拿揑收水時機,再控制市場預期,令對股市的影響降至最低,非常考驗鮑威爾的智慧。

講番個通脹數據一出,10年期美債息就抽穿雙底頸線,下站睇1.8%,科技股繼續易跌難升,宜逢彈減磅,撈貨可免則免。另一邊廂,美滙低位抽咗一棍,但91都去唔到,似乎大戶仍在賭有排未收水,始終全球疫情反覆,復蘇注定好慢好慢,但供應鏈持續緊張,商品價格仍有權再爆一段,銅鋁鐵回氣之際,相對落後的油金銀可睇高一線。

魏力

fb.com/2012jason

關心你飯碗,貼近你生活,即Like「蘋果ATM」FB專頁!
BannerBanner