舖王離世|施永青憶初入行「送訂」予波叔 大讚「畀佣金好爽手 」

更新時間 (HKT): 2021.05.15 17:53
中原創辦人施永青指,波叔對代理畀佣金「好爽手」

「舖王」鄧成波縱橫地產界40年,早年已投資有道,在地產界人緣甚好。有不少曾經接觸波叔的地產代理指,波叔為人低調無架子,投資物業上事事親力親為,經常約代理親身去睇舖,買舖睇準升值潛力,較心儀地舖,區區都有涉獵。

中原集團創辦人兼主席施永青憶起認識波叔的經過:「我70年代尾出道時,佢(鄧成波)已經喺地產投資有一定地位。佢最初做車行,有間叫《成功車行》,買賣二手車生意。之後買不同住宅,後期才轉去買舖位為主。」「我記得我做前線嘅時候,約70年代尾、80年代初,曾經送訂(訂金)去佢屋企,佢當時買大圍世界花園單位。」

施永青指,波叔生前與地產代理熟稔,做生意有口齒,而且畀訂金亦相當爽手。「當時我哋中原名不見經傳,得幾條友,不過波叔講好嘅價錢就會簽,唔會臨尾反價。有啲業主見你送訂,有時會搲多口價賣貴啲,但係波叔唔會咁,講好幾多就幾多,覺得(做波叔生意)幾順利。」

波叔畀佣金爽手 漸成業主付佣新行規

施永青指,波叔未投資舖位前,已常常入市投資住宅物業,買入二手單位或者樓花新盤。當年其入行時,業主賣樓可以免付代理佣金:「有代理會貼街招「歡迎委託,業主免佣」,中原係少數收業主佣金嘅代理,所以好多時遇到業主唔肯畀佣,或者要求減佣。有波叔呢類業主捨得畀佣,之後先慢慢變成行規。」

施永青表示,中原與波叔多年來買賣交往甚多,有生意會優先搵他。施永青透露一次與波叔食飯時,被波叔問為何不自己買貨投資:「佢幫襯啲經紀買貨,通常經紀嘅老細都會自己入貨,令波叔感覺,介紹啲貨畀我,都係畀你老細睇完唔要、唔啱先輪到我買,咁我咪執二攤好無癮?」所以他問施永青點解唔自己買。

施永青回應波叔:「我唔係唔買,買貨係我個人投資,唔係公司業務,我無舖王咁熟行情,經紀畀我睇都嘥氣。」他指,早年試買舖投資,被波叔笑「眼光唔好」,認為自己投資方面非強項。施認為,由於自己甚少「買埋一份」,令波叔覺得跟他買貨比較多筍盤。施補充,幾十年前香港買樓一宗成交只是數十萬元,1%佣金就賺幾千蚊。到後期波叔越買越貴,中原曾經波叔手上簽成一單deal,賺過千萬元佣金,多年來中原從波叔手上賺到的佣金數目約超過一億元。

施永青指,香港地產市場上上落落,鄧成波就一貫看好樓市,所以多年都一直都入市,買入多過賣出。不過當然,撞正個市跌,一貫睇好的人都有機會蒙受損失。

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner