【笑到最後】QE永久推 美股繼續升 - 高明

更新時間 (HKT): 2021.05.17 02:00
■通常越廢嘅政權,就越依賴印鈔同埋基建去刺激經濟,拜登已經啟動兩萬億美元基建方案,某程度又會助長印鈔找數。 資料圖片

上星期美股一輪大上落,再次確認疫情時嘅趨勢:疫情加速科技應用。

接連幾個數字:CPI升4.2%好過預期、美國樓市漸強、股價一早大升、新增職位26萬遠差過預期,一般可能解做通脹或者滯脹之類,但只要疫情下稍為感受一下,就知疫情改變咗工作生態,根本唔需要咁多人做嘢,或者唔需要咁長工時喺工作地點,都可以達相同效率。

有呢個客觀事實,至少可以得出幾個結論:

(1)科技股大跌只係估值嘅問題,而唔係存亡嘅問題,最後你都係要用,而且將會用得更多。啱啱嘅一季業績,科技股強勁增長,成個趨勢仍傾斜向科技股,只係股價跑前咗;

(2)經濟回到疫情前嘅水平,就業都唔會重返同一水平,因為毋須咁多人,科技或流程改良取代咗人手;

(3)就業返唔到以前嘅水平,算唔算經濟過熱,加息救唔到就業又可能打窒經濟增長;

(4)冇咁多人做嘢,少咗人交稅,個個期待派錢,啲錢唔印邊度嚟。

通常越廢嘅政權,就越依賴印鈔同埋基建去刺激經濟,因為兩樣都唔使點用腦。一般政府基建都係無效率嘅財政黑洞,拜登已經啟動兩萬億美元基建方案,某程度又會助長印鈔找數。

美帝版QE就係「無成本,又可以起嘢,點解唔做?」唔做嘅原因,就係有好大嘅自信,國家經濟增長強到解決就業及政府財困等問題,望一望現屆政府施政,已經喺度抄上屆做法,奧巴馬兼Trump2.0炒埋一碟,由拜登一字排開似唔似係一隊有能力嘅人?

所以本欄一直強調,加息只係行政體系奪聯儲局權嘅口號,「你睇佢冇加息、你睇佢幾廢?」到佢安插自己友做聯儲局主席後,就會換另一套講法。可能會減慢買債,或加一次半次息做樣,但QE肯定係美國永久國策,嗰啲咩加息近了,全部當假跌看待。

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner