智取大市|加密幣災後的未來(晉佳)

更新時間 (HKT): 2021.05.20 16:00
若然金融世界接受加密幣為真正貨幣,就會擾亂美元在全球主流貨幣的地位。
(Reuters-HK)

加密幣市場炒嘅憧憬,係炒一個加密幣衝擊傳統貨幣制度嘅未來。加果加密幣嘅未來只係流於做貨品買賣嘅話,咁我哋要加密幣嚟做乜?我哋有個PayMe港幣交易咪一樣搞掂。

加密幣嘅未來在於搶佔甚至取締美金等等主流貨幣,可以存款、經過儲備比率後,同一筆加密幣可以再形成貸款,達致乘數效應,成為傳統貨幣以外嘅選擇以至競爭者,唔好天真到以為Bitcoin用嚟買吓賣吓Model 3就好犀利。

加密幣同科技股都係炒未來,唔同嘅在於實現未來嘅能見度。科技股以Tesla為例,幾年後有埋自動駕駛,再加上啲車大賣令成本效益上升,仲有其他新業務,而家嘅幾百倍PE其實等於幾年後嘅幾十倍PE。加密貨幣幾年後有冇能力實現大家預期嘅價值?成為真正嘅「幣」?都仲要過到聯儲局、人行嗰關,話晒加密貨幣係美元、人民幣嘅敵人,若然金融世界接受加密幣係真正嘅貨幣,就會擾亂美元喺全球主流貨幣嘅地位。聯儲局都未真正出手搞局,就搞咗場幣災了。

另一重點,係Elon Musk放棄接受Bitcoin作為Tesla付款單位,試想像,買賣貨品呢個咁低門檻嘅用途都做唔到,又點會有本事衝擊傳統貨幣制度?肯定嘅係未來仲會屢敗屢戰,只係未見到成功可能性而已。加密幣大反彈嘅誘因,至少係Tesla彈出彈入接受返Bitcoin付款先。

晉佳

https://www.instagram.com/guyyeung/

https://www.facebook.com/advanceguy1

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner