【智取大市】加密幣災後之未來 - 晉佳

更新時間 (HKT): 2021.05.21 02:00
■加密貨幣幾年後有冇能力實現大家預期嘅價值,必須要過到聯儲局、人行嗰關。資料圖片

加密幣市場炒嘅憧憬,係炒一個衝擊傳統貨幣制度嘅未來。如果加密幣嘅未來只係流於做貨品買賣嘅話,咁有個PayMe港幣交易咪一樣搞掂。

加密幣嘅未來在於搶佔甚至取締美金等等主流貨幣,可以存款、經過儲備比率後,同一筆加密幣可以再形成貸款,達致乘數效應,成為傳統貨幣以外嘅選擇以至競爭者。

加密幣同科技股都係炒未來,唔同嘅在於實現未來嘅能見度。科技股以Tesla為例,幾年後有埋自動駕駛、再加上啲車大賣令成本效益上升、仲有其他新業務,𠵱家嘅幾百倍PE其實等於幾年後嘅幾十倍PE。加密貨幣幾年後有冇能力實現大家預期嘅價值?成為真正嘅「幣」?都仲要過到聯儲局、人行嗰關,話晒加密貨幣係美元、人民幣嘅敵人,若然金融世界接受加密幣係真正嘅貨幣,就會擾亂美元喺全球主流貨幣嘅地位。聯儲局都未真正出手搞局,就搞咗場幣災了。

Elon Musk放棄接受Bitcoin作為Tesla付款單位,咁低門檻嘅用途都做唔到,又點會有本事衝擊傳統貨幣制度?肯定嘅係未來會屢敗屢戰,只係未見到成功可能性而已。加密幣大反彈嘅誘因,至少係Tesla彈出彈入接受返Bitcoin付款先。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner