【異動空間】賭美聯儲睇錯市? - 魏力

更新時間 (HKT): 2021.05.21 02:00
■美聯儲若發現自己「睇錯市」而調整政策,急急收水甚至加息,屆時個市就「真的GG了」。資料圖片

美國通脹猛、驚加息,為何美滙近期跌跌不休?答案就是「睇死」美聯儲唔敢加息,美金自然先沽為敬。

拜登在位,加稅搞基建、醫療、教育勢在必行,佢老人家拍心口話,年收入40萬美金以上的人先要加稅,但富人稅一蚊未收,窮人稅已水浸眼眉,這就是「通脹稅」。

由於炒美股關係,魏力近年follow不少美國投資分析師的Twitter,近日佢哋不斷埋怨的就是加價,麵包又加幾多巴仙,香蕉又前所未有咁貴,真係「好黐線」!美國今年首4個月通脹2%,年率化計就是6%,幾耐未見過?再考慮到通脹每個月都在加速,究竟埋單係幾多?無人知,但諗起都驚。

到目前為止,美聯儲仍然月月買債放水,對目前通脹亦強調係「過渡性」,唔使驚。呢句話令我諗起2007年初入行做報館編輯,當年次按危機已見苗頭,但伯南克仍不斷話「情況大致受控」,唔使驚。結果?2008年大家知咩事。

後續會點?商品大漲小回,科網欲升乏力,「股市預示,滯脹將至」,上周文章已分享個人觀點,目前睇法不變。再下一步,就視乎美聯儲幾時發現自己「睇錯市」而調整政策,急急收水甚至加息,屆時個市就「真的GG了」。

魏力

fb.com/2012jason

關心你飯碗,貼近你生活,即Like「蘋果ATM」FB專頁!
BannerBanner