風水輪樓睇|四大新居屋風水攻略 師傅點評「旺丁旺財」單位

更新時間 (HKT): 2021.05.21 00:00

4個新居屋即將揀樓喇!《風水輪樓睇》術數家蔣匡文博士同你逐個居屋解構。博士重申過好多次,風水無絕對,像太極,極黑之中有點白,極陽之中帶點陰。4個屋苑各有優劣,1個利文,3個利武,行行出狀元,不過在利字當頭的社會,博士就話有個居屋可住到發達。

鑽石山啟翔苑:利讀書 望活水公園發達

  • 發達單位:A座25至32樓的4室
  • 利讀書單位:B座7、8、9室

蔣匡文表示,鑽石山以前是一座石頭山,風水上視為「地薄」:「逢親見到石頭山,古人叫『出硬骨頭』,即係捱得嘅人。但呢個地方係咪度度都衰呢?石頭山好得意,通常有啲暗穴,即係石與石中間有綠草,咁呢啲位置就會係靚嘅位,所以呢區吉凶一半一半。」

他指出,啟翔苑東北位有志蓮淨苑,東南位是文昌位,將來興建一座孔廟,越接近孔廟的座數就越有利讀書。屋苑分兩座,接近孔廟為B座6、7、8、9及10室。雖然有街坊認為這座建築與屋苑格格不入,但它可擋了路煞。另外,飛鵝山位於屋苑東北位,在風水上視為「夷門」或「鬼門」,「雖然聽落有少少貶義,但呢個係傳統叫法。鬼門喺屋苑東北位,如果間屋住嘅人有宗教信仰咁就大利;如果乜都唔信,淨係信錢嗰啲,唯利是圖嗰啲,就麻麻地喇!因為呢度附近好多唔同宗教場所,包括教堂、黃大仙等等,如果有呢啲宗教信仰就配合呢度理氣,所以會容易順利。屋苑有吉有凶,基本上唔錯,只不過係出啲捱得嘅人,視乎每間屋靚唔靚,間屋靚咪掂囉,可以捱到上去發達,間屋唔掂咪捱一世囉!」

博士指,的而且確啟翔苑是有單位有機會住到發達,關鍵在活水公園的設計。「活水公園喺屋苑嘅西方,如果設計到有水聚,而單位望得到水聚,加上方位配合,係有機會發達!但高低層有分別,一般直望出去見到活水就最啱,就唔係好似低頭望腳趾嘅角度,咁就叫割腳水。」他舉例,北京紫禁城的西方就有三海,但如果活水公園設計到「兩條瀑布,啲水㗾㗾聲咁走晒……咁我話會發達嘅言論就要收返。」

根據活水公園設計圖,公園內有水景及池塘,正是博士認為可以聚水的設計。他補充,以單位窗口望見活水公園為準。樓層方面,取「九五位」,即是把大廈全幢分開6段,當中包括停車場及防火層等等,最好樓層就是由下向上數第5段。

粉嶺山麗苑:利武旺丁 有座陽氣盛

  • 旺丁:A座
  • 旺向:大門向西、大門向南

粉嶺山麗苑位於皇后山,龍脈來自附近龍山。龍山到龍躍頭有一個格局叫「五虎下地堂」,就是老圍附近的5個小山丘。睇這處風水,需要從老圍來睇,皇后山是老圍的白虎位,「當年鄧氏唔去白虎位起屋,而走來老圍呢邊就有理由。老圍食正龍脈,白虎位就帶煞,喺白虎位出世嘅小朋友就比較難教、唔聽話。」

博士稱:「呢度啲人唔好旨意讀好多書,但唔文就可以靠武職來發達。不知幾多車行老闆由修車仔出身。好多職業都算武職,例如Tesla、電腦硬件。如果有小朋友可以喺呢方面培育佢,唔好逼佢入名校,都可以做運動明星。」皇后山還有一個好處,南方有山但無路,代表旺丁,西北位有靶場,古人話出軍政,今時今日就代表紀律部隊。

博士續指,山麗苑有一座近馬路,比較四四正正,偏離山,陽氣夠,越靠近山陰氣越重,但陰氣重不代表好或不好,可以說是較有利女性或容易生女。屋苑比較旺的單位,是大門向西或向南。至於高低層方面,中低層比高層較有利丁運。然而屋苑四周缺水,概括而言,旺丁不旺財,「除非職業係武職或偏門,例如飲食、電腦硬件、揸槍搵食,就叫做唔使咁窮。」

馬鞍山錦駿苑:東面有山 出尚武之人

  • 較旺座數:E座,其次A座
  • 較旺座向:大門向南

馬鞍山錦駿苑東位是山,西位有路,不符合九運零正,「零正不配合,發唔到達囉!」屋苑由5座組成,從航拍俯瞰可見猶如「8」字,「中間兩座啱啱喺尖角位,呢兩座就最差,其他3座好啲,但其實整個屋苑情況一般般。」如果硬要選擇,最北的E座最好,其次為屋苑最南的A座。位處尖角位的B座及C座,煞氣重,視乎當事人命盤和單位坐向的組合,一旦配合不宜,容易意外災病。由於屋苑對開有行車路,假如單位望見行車路,最簡單做法是窗口放置凸鏡。

不過屋苑東位有山,代表此處出尚武之人,適合武職,例如飲食、廚師、機械等等。座向方面,以門口向南比較好。此外,沙田濾水廠在屋苑西南位,位處城門河河口,構成了「羅星塞水口」的格局,令沙田興旺,越來越多人居住。濾水廠搬遷後,假如興建高樓大廈就更為旺丁,不排除令這個屋苑有另一番光景。

火炭彩禾苑:旺丁旺財 但並非大發

  • 旺丁:窗向西南
  • 旺向:大門向東南

屋苑位於火炭工業區山上,真正是一支插針樓。在航拍中可見後山是沒有樹木的,越落就越多石頭,古人叫做「好粗嘅龍」,適合工業、污染等等立立雜雜的行業發展。幸好來到屋苑後方是綠油油的樹木。踏入九運,零正勉強可以,即丁運及財運,但由於背後為「好粗嘅龍」,此處都是利武不利文。

屋苑主要有兩種景觀,分別是山景及工業區,博士認為:「望山較好,因為向坤位,坤位有高山代表旺丁,有山亦有蔭,蔭係可以蔭財。而且屋苑有個好處,就係有個平台,變咗唔會有單位俾樹木包圍,因為太多蔭,就變咗招陰邪。(屋苑望山景係咪旺丁旺財?)係可以,但唔係大發嗰種,係循序漸進,一步一步嗰種。」至於單位高低層就沒有太大分別,反而座向就有分別,而此屋苑最佳座向是門口向東南。

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner