笑到最後|加密貨幣明知騙局都會繼續炒(高明)

更新時間 (HKT): 2021.05.23 11:29
高明指,加密貨幣雖然非人人可以編寫,但信奉加密貨幣的人,都會隨住價格上升而增加,三幾隻已經成名加密貨幣,已經同反QE捆挷。

加密貨幣出現幣災,普遍批評有:

1. 係人都可以推出加密貨幣,仲要冇成本,所以係騙局;

2. 冇得買雲吞麵,唔係貨幣,冇投資價值;

3. 虛擬嘢連實物都冇,純粹騙局。

上述三大指控,合情合理,高明曾經相信。但係早喺Bitcoin升至1,000美元暴跌,以及之後10,000美元後暴跌時,都有類似論述,最新幣災後Bitcoin仍值逾3萬美元。上述論調,高明由信變唔信。

退一萬步,就當加密貨幣完全騙局,其實都唔代表跌完就drop to zero。類似情況,喺鑽石市場已經發生過一次,依家勁到大眾明知鑽石供應其實大把,但因為將求婚呢個意念捆挷,男人求婚都係要死死地氣買粒鑽石。

更活生嘅例子係Fiat Money之後嘅貨幣,全球認受性最高嘅美元,經歷兩次重大QE,已經失去部份儲存價值,所以啲股、樓先係咁炒。

的確阿豬阿狗都可以出幣,但係打響名堂嘅只係得幾隻,就好似普天之下180種法定貨幣,真正值得持有嘅鈔票,不出10種,加密貨幣市場生態成熟之後,相信都會係一樣。

至於冇形、摸唔到嘅嘢就冇價值,可能係上一代嘅睇法,生於買賣虛擬年代嘅人未必一樣,點解釋一個𡃁仔上網畀人偷咗件虛擬武器就喊苦喊忽?價值,係好主觀嘅事,價格只係一堆買賣嘅人妥協得嚟嘅結果。如果呢個世界只有一個人欣賞嗰件虛擬武器,而嗰件武器又可以任印,最終當然會唔值錢。

現實係,加密貨幣雖然係人都可以編寫,但信奉加密貨幣嘅人,都會隨住價格上升而增加,三幾隻已經成名嘅加密貨幣,已經同反QE捆挷。一件已經成形嘅「賭具」,永遠唔會消失,老虎機都被證實玩家必輸,但大把人玩,證明賭徒死完一批又會有另一批。

今日寫呢篇文,唔係叫大家投資加密貨幣,而係想大家唔好咁繃緊,見新嘢就踩、幣災就奚落。上年無限QE後,根本所有資產包括美元,已經進入騙局模式,最終啲價值會去咗邊,根本要試出嚟,

高明

MeWe: https://bit.ly/2Y89PjV

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略