Second Life|虛銀不可能有自肥企劃(杜夫人)

更新時間 (HKT): 2021.05.23 14:09
杜夫人指,過去銀行用最低成本吸存,再借錢出去賺息差,本來是自肥企劃,在目前息差不斷交窄的環境,銀行點可能肯賺少啲。圖為《ERROR自肥企画》劇照。

匯立銀行(WeLab Bank)日前推出私人貸款,息率低至1.68%,冠絕虛銀私貸息率,甚至比發鈔行近日優惠(介乎1.75%至2.06%)更抵。

另推出「私人貸款息率掛鈎存款」優惠,概念類同mortgage link戶口,惟市場從無這類產品,創新之餘,優惠又大眾化,用戶有多餘錢可以考慮放落嚟對沖,減少利息成本,等同銀行「主動讓利」,真正普惠金融。

過去傳統銀行無人肯做,大概因為存款同貸款對立,用最低成本吸存,再借錢出去賺息差,策劃一場自肥企劃,而家喺息差窄到無朋友的世代,更加無條件讓利。然而,虛銀無老本食,要在競爭激烈的市場突圍,就不可能跟前人一樣自肥,在成本低一截的情況下,推出至抵回贈及貸款利息優惠相當合理。

有人問,匯立銀行的P loan link上限存款是貸款額的50%,係咪等同借少一半錢?都可以咁講。然而,筆者傾向相信無人借100萬,然後放50萬在戶口,就係為咗減少利息開支啩?可能性較高的是,借完100萬元投資,再諗諗手上數十萬元的存款係咪調撥過嚟,賺1.68%存款息率,反正放在其他銀行就無呢個offer。

貸款、風險分析是匯立銀行母企WeLend強項,風險分析做得好,貸款定價可以更準,而且「link得起」的用戶,有額外錢放喺銀行,都知個客係乜料,信貸質素不會太令人擔心。所以話,是創新得嚟又安全的產品。計掂數,又如果可以的話,link feature變regular就更好喇!

如果可以的話又講多兩句。多位朋友反映「回贈滯後」的問題,其中一位早前使用livi扣賬卡網購衫褲鞋襪,等足一個月未收到額外7%回贈。最理想當然係提升系統,提供即時回贈,唔得的話,現階段至少可即時alert用戶該筆是否合資格簽賬,及預計回贈入賬日期,好讓用戶等得安心。

另外,讀者透過眾安銀行消費後出現雙重交易,通知銀行後已透過沖銷取消其中一條交易,其後卻被無故扣起相關資金,結果兩星期後才得以解決。這可能是單一情況,之不過喺呢個年代,銀行扣起用戶錢又係真心驚。如果虛銀用戶遇到問題,不妨pm本夫人一齊研究。

杜夫人

https://www.facebook.com/mrsmarydoo

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner