【笑到最後】明知騙局都會繼續炒 - 高明

更新時間 (HKT): 2021.05.24 02:00
■經過最新幣災後,Bitcoin仍值逾3萬美元。就當加密貨幣完全係騙局,都唔代表跌完就drop to zero。 資料圖片

加密貨幣出現幣災,普遍批評有:

1. 係人都可以推出加密貨幣,仲要冇成本,所以係騙局;

2. 冇得買雲吞麵,唔係貨幣,冇投資價值;

3. 虛擬嘢連實物都冇,純粹騙局。

上述三大指控,合情合理,高明曾經相信。但係早喺Bitcoin升至1000美元暴跌,以及之後1萬美元後暴跌時,都有類似論述,最新幣災後,Bitcoin仍值逾3萬美元。上述論調,高明由信變唔信。

退一萬步,就當加密貨幣完全騙局,其實都唔代表跌完就drop to zero。類似情況,喺鑽石市場已經發生過一次,𠵱家勁到大眾明知鑽石供應其實大把,但因為將求婚呢個意念綑綁,男人求婚都係要死死哋氣買粒鑽石。更活生嘅例子係Fiat Money之後嘅貨幣,全球認受性最高嘅美元,經歷兩次重大QE,已經失去部份儲存價值,所以啲股、樓先係咁炒。

的確阿豬阿狗都可以出幣,但係打響名堂嘅只係得幾隻,就好似普天之下180種法定貨幣,真正值得持有嘅鈔票,不出10種,加密貨幣市場生態成熟之後,相信都會係一樣。

至於冇形、摸唔到嘅嘢就冇價值,可能係上一代嘅睇法,生於買賣虛擬年代嘅人未必一樣,點解釋一個𡃁仔上網俾人偷咗件虛擬武器就喊苦喊忽?價值,係好主觀嘅事,價格只係一堆買賣嘅人妥協得嚟嘅結果。

現實係,加密貨幣雖然係人都可以編寫,但信奉加密貨幣嘅人,都會隨住價格上升而增加,三幾隻已經成名嘅加密貨幣,已經同反QE綑綁。一件已經成形嘅「賭具」,永遠唔會消失,老虎機都被證實玩家必輸,但大把人玩。今日寫呢篇文,唔係叫大家投資加密貨幣,而係想大家唔好咁繃緊,見新嘢就踩、幣災就奚落。上年無限QE後,根本所有資產包括美元,已經進入騙局模式,最終啲價值會去咗邊,根本要試出嚟。

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner