收市閒情|Mirror、Error的商界爭奪戰(千頌C)

更新時間 (HKT): 2021.05.25 20:35

香港如屎一般的社會氣氛下,Mirror、Error於天時、地利、人和配合下,成為炙手可熱偶像組合,令香港事隔N年,終於有星可追,仲有值得狂煲嘅電視節目,實在係一年令人高興嘅事。認真,《ERROR自肥企画》每一集我都睇最少兩次或以上,連我都覺得誇張。

呢16個後生仔,對大眾嘅意義,可能係「香港樂壇娛樂圈未必」、「香港仲係一個可以俾你追夢嘅地方」;不過,對一眾廣告商來講,Mirror、Error嘅意義更加重大,因為佢哋已經成為一個Trophy。

話說最近同一班廣告、marketing朋友食飯,大家話題當然有提呢16個男人,「你估我唔想搵佢咩,貴呀嘛」「姜濤而家落一落去要XX萬,個客邊度畀得起。」到底係XX萬?我就唔爆,話晒係人哋商業機密,總之就係唔平啦。

開得呢個價,但係大家唔難發現,一開IG、FB,幾乎所有商業代言都係由呢兩隊組合成員包攬,銀行、保險唔在講,仲有一堆女人化妝品、護膚品,連193自己都話好多衞生巾廣告商埋身。如果你問有冇成效呢,鏡粉,特別係姜糖出名消費力強,據講姜濤代言某個奢侈品牌時拎住個product,係會極速沽清,然後啲姜糖仲會好真心咁同個Sales講,「真係多謝你哋支持姜濤呀。」

刺激銷情以外,朋友話而家香港唔同金融機構,都搶住要approach Mirror去做代言,我當時就話,「一定係啲高層阿姐係鏡粉」。此時,朋友露出一個招積嘅眼神,「No~係因為佢哋可以攞威,『嘩,你搵到姜B代言,好勁呢!』『你都唔弱,搵到Anson Lo。』」冇錯,喺手袋以外,Mirror嘅爭奪,已經成為商界阿姐另一個戰場。唔難理解呀,姜濤、193就得一個,簽代言約真係手快有手慢冇。

Mirror、Error捱咗三年,到今年終於捱出頭,同時亦令Viu鋪咗三年嘅長線投資,終於踏入收成期。三年前你同人講,Mirror、Error會爆紅,冇人信;到今日Viu話畀香港人知,只要畀機會後生仔,香港仍然仲有無限可能。

對於ViuTV嘅成功,八掛嘅我走去Google董事兼總經理魯庭暉「魯暉」嘅舊訪問,其中呢一段《蘋果》專訪好有趣:「本身讀Band 5中學的魯暉憶述,中一時有一名女同學想轉校,『為咗要同佢有共同話題,所以我都想轉校,咁大家就研究轉校,給果佢轉到聖心,但我去咗男校,緣份到此』。」嗰間男校,就係皇仁書院,secured。

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner