【信里一城】藝人買劏場劏廠中伏 - 小師兄

更新時間 (HKT): 2021.05.27 02:00
■劏場劏廠是經紀諗出嚟賺兩轉佣金的計劃,當時辣招出台後,經紀無啖好食,於是叫投資者買大單位入則拆細,再搵另一班人接貨。 資料圖片

藝人莊思敏60萬元賣出持貨16年的銅鑼灣劏場蝕120萬元。其實又點止一個藝人喎!

劏場劏廠,最記得羅仲謙在2017年以300萬元買入2個觀塘約100方呎及1個柴灣160方呎工廈單位,3個單位平均呎價7,800元。睇番土地註冊處成交紀錄,該觀塘物業其後越賣越平,2019年成交呎價約6,200元,去到2020年呎價約5,500元,而且儲物室用途有限制,大多數都是只能擺貨,想賣返出去唔容易。至於該柴灣同系單位,2017年中至今未有任何劏廠成交,都唔知要守到幾時。想當日謙謙還被拆售該物業的代理拿來做生招牌。

可能你會話一日未賣都未叫輸。但究竟是業主惜售還是買家想買買唔到,就心知肚明。部份銀行對劏廠按揭審慎,甚至不做按揭,已知咩事。

其實劏場劏廠是經紀諗出嚟賺兩轉佣金的計劃,當時辣招出台後,工廈舖位銀碼大,經紀無啖好食,於是先叫投資者買一層或一個大單位,之後入則拆細再搵另一班人接貨。因為銀碼由幾十萬起,比車位更低,吸引好多街坊師奶客。有些人買番嚟都唔知自己買乜,甚至乎有些人買咗才發覺做唔到按揭而撻定。

小師兄

fb.com/siuching28

關心你飯碗,貼近你生活,即Like「蘋果ATM」FB專頁!
BannerBanner