【智取大市】恒指轉強 攻二三線 - 晉佳

更新時間 (HKT): 2021.05.28 02:00
■恒指最近出乎意料之外轉強,突破阻力機會相對高,港交所可視為跟貼市場嘅選擇。資料圖片

恒指最近出乎意料之外轉強,升近29300點左右嘅阻力,以陰陽燭計,形成咗上升裂口並肩陽燭,係短線強勢徵兆,多數有follow,尤其第二支並肩陽燭嘅周四,實情係唔少股份炒作,睇唔到市場係屬於整固階段。

好難解釋轉強原因之下,市場半信半疑,反而證明市場未見超買,突破阻力機會相對高,舊年美股喺疫情之下升到破晒頂就係一個範例。呢啲情況,短線部署不妨積極一啲,有盈利喺手然後再且戰且走。

重磅科技股首季業績較差,預佢哋暫時係弱勢股,可以唔理一排,轉攻二三線。重磅科技股不濟,都有其好處,就係多咗游資可以炒其他股份,有部份二三線、貨較乾嘅股會挾得比較癲,例如近排輪流起步嘅醫美股,以為昊海(6826)唔識升,就一日爆升18%畀你睇,呢一刻仲有唔少未破位嘅受市場歡迎股份正待起動,可以吼吓,個股有可能挾到你唔信,唔好睇小。

跟得恒指最近嘅選擇,自然係港交所(388)同富途,尤其富途自然更具爆發力,較穩健嘅低估值風電股可以繼續持有,銅、鋁價或整固完畢,商品股亦值得留意機會。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner