操盤手札記|6月見「基」行事(割柑人)

更新時間 (HKT): 2021.05.31 17:06

人民幣上周轉強,中間價、在岸價、離岸價分別升破6.39、6.37、6.36關口,見3年高位,官媒降溫無效,本周一中間價再升破6.37,一年升值12%。美滙指數繼1月後,5月再跌穿90關口,只要明確跌穿2018年頸線88.25,大型雙頂就成立,新一輪美元跌浪就啟動,有利新興市場。

近日唔止人民幣轉強,中國股市亦轉強。除咗關美元事,仲有一個因素值得注意,就係7月1日中國共產黨建黨100周年,通常逢五逢十嘅紀念日,市場氣氛都會偏好,何況今次100周年!係咪「五窮月」不窮,「六絕月」命不該絕?中國股市除咗睇政策,仲要睇水頭足唔足!

中國5月下旬係稅期,但流動性未見緊張,皆因地方債發行比預期慢;不過,繳稅高峰期一過,上周即有3,195億人民幣地方債計劃發行,今年新增額度1.77萬億,剩餘有成萬億,預計集中6月至8月發行,期間流動性料維持中性偏緊。A股轉勢言之尚早,睇A股頭嘅港股亦然。

周一,中港股市分別升0.4%同0.1%。恒指收29151,短線料於29000關口繼續進行攻防戰。觀乎中國今年新增地方專項債主要用於交通、能源、水利、環保、社會事業、冷鏈物流、市政、國家戰略、安居工程等九大領域,有望帶動基建投資,相關股份不妨留意,見「基」行事。

基建提速,帶動水泥需求。海螺水泥(914)係行業龍頭,產品廣泛應用於鐵路、公路、機場、水利工程等大型基建項目。農曆新年以嚟,水泥漲價,海螺首季多賺18%。該股10天線剛升穿20天線,現價48.5元,預測市盈率5.9倍,預測股息率5.4厘;留意返,該股周二(6月1日)除淨,股價將作相應調整。

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner