【收市閒情】躺平「本pae」與All In - 千頌C

更新時間 (HKT): 2021.06.02 02:00
■近來中國新興一種「躺平主義」。互聯網

喺呢個令人窒息嘅社會氣氛下,相信有唔少年輕人心感壯志難酬,於是決定搵多兩個錢,令自己可以有多幾個出路。

最近有大學生訪問,話投機以外,搵唔到向上流動嘅方法,於是決定all in炒股票。如果落注前已做足功課,心理上亦準備充足,學股榮話齋,有輸鑊甘嘅心理準備,all in趁後生,又真係唔係錯。

唯一想提一提嘅係,如果你all in瞓身落一隻股票嘅動力,係純粹「冇呀,見佢買我咪買囉。」咁請你記住,功課你冇做過,贏錢時你當然有份賺,但輸大鑊就千萬唔好怨。

面對生活嘅無力感,願意去搵方法上流,即使只係投機,其實都算係積極嘅做法。近來中國新興一種「躺平主義」,大致上指唔返工、唔買樓、唔消費、唔結婚、唔生仔等等,將人生慾望降到最低點,只要成為一棵躺平的韭菜,咁就難被割了。唔使講得咁複雜,躺咩平,廣東話兩個字,即係「拚䠋」(音:本 pae)。中國催生出拚䠋主義,睇輿論都知係俾996工時逼出嚟,工時又長又辛苦,營營役役,結果樓又買唔起,老婆又娶唔起,最後喺社會成為被割韭菜嘅目標。事實上,韭菜來講本身就係一條食物鏈,蟻民被商界割,商界被政府割。

諸如馬雲,建立出一個阿里王國,最後都被收割。「國進民退」一直有發生,內地傳媒之前亦有統計過,近3年中國國有資本狂掃A股上市企業,2018年有16間、 2019年有34間由民企變國企,而2019年更佔當年民企易手數目六成,2020年有40間,佔易手民企的超過五成。計計埋埋,即係過去3年有90間民企變國企。辛苦創一番事業,最後都要報效國家。

眼見槍打出頭鳥,但如果你一直拚䠋躺着,就算中槍都未至於太傷。呢個係中國社會現實,對比起「拚䠋」,香港後生仔都仲有all in嘅拼博精神,算唔算長進?

千頌C

fb.com/winbigwok

關心你飯碗,貼近你生活,即Like「蘋果ATM」FB專頁!
BannerBanner