【冰說聰明】破頂又是配股時 - 青冰

更新時間 (HKT): 2021.06.03 02:00
■藥明生物主席李革(左)及首席執行官陳智勝(右)。資料圖片

藥明生物(2269)在2017年6月上市,由於去年股份曾經一拆三,所以招股價經拆細後是每股6.86元,下星期便是上市四周年了,以昨天的收市價120.9元計算,四年來累升17倍,睇股價已可稱為神話,但大股東不斷減持、股價不斷創新高,亦是令人驚嘆的神蹟。

青冰翻查紀錄,大股東在2017年12月首次作出減持,因為上市後半年的禁售期屆滿,自此共配股減持12次,最近的4月底,以每股107元再減持1.08億股,相比起4年前首次減持時沽了10%股本,套現50億元,最近呢次係咁意沽2%,已經係115億元,認真誇張,4年來12次配股減持,當中仲未計有4次發新股集資,即係話4年批股16次,真係鼎力支持港交所(388)成為國際金融中心呀。

藥明大股東減持亦非常有秩序有性格,大概每三至六個月就減一次,即使在2019年遇上社會運動,去年遇上肺炎疫情,都不理市況地有序減持,而自2019年起,每次減持的價格,都總會比上一次高,接貨者全勝,以去年4月為例,在疫情肆虐得最嚴重、市場最虛弱之時,個價仍比上次高1%,問你服未。而最近一年的玩法就係,選擇在破頂後配股,去年9月正式染藍,股價乘勢破頂,不過就在正式染藍前兩天,就批股減持,接貨者雖然要短暫捱價,但一個月後又再創新高了。大股東慣性會承諾3個月或6個月內不再減持,但只要配售代理書面同意,其實仍然可提前配股再沽,而這個書面同意,在過去一年就出現了六次,所謂的承諾完全靠唔住。

現時股價距歷史高位只有6%,雖然4月係承諾咗6個月禁售,但睇返個往績,破頂又是配股時,信圖應比信禁售承諾有用啊。

青冰

fb.com/chingbing888

關心你飯碗,貼近你生活,即Like「蘋果ATM」FB專頁!
BannerBanner