創業起義|港產世界級傳感器初創(尹思哲)

更新時間 (HKT): 2021.06.05 22:33

幾日前,電動超跑獨角獸 Rimac 出新車,全球限量僅150 輛,售價240萬美元起。

若冇留意開電動超跑,未必知道 Rimac。佢早年首架出品Concept One,賣點係每個車輪配一個電動馬達,加速100公里僅2.5秒,當時打敗咗Tesla P90D及LaFerrari。

大家或會問,比起Tesla,Rimac產能會係點?要知道,Concept One 全球出得8架,新出嘅 Nevera 亦只限量150架。雖然每架成百幾二百萬美金,但賣晒都唔夠10億美元喎?

早兩日,我同創辦人S視像會議,佢創業前做金融,喺香港參與過 Rimac 嘅A輪融資。佢話表面上 Rimac 係電動超跑,但佢價值在於自家嘅技術,包括電池組、傳動系統以至引擎控制單元。他日唔止於電動跑車,套用喺電動車、電動單車、甚至航海業亦無不可。

其實創辦人S檔生意,都係同一個邏輯:表面上做緊consumer market,但最值錢,都係內裡技術同工藝。

佢三年前轉換跑道,睇中智能家居範疇,揾嚟歐洲嘅科學家,喺香港開檔搞傳感器,推出咗混合16種感應、號稱全球最細嘅智能傳感器,包括聲音、嗅覺、温度、濕度、光度、震動、移動、二氧化碳等不能盡錄。

創辦人S最近上咗電視新聞,應用場景係照顧長者需要。因為好多老人家收收埋埋,或者記性唔好,幾時做咩,做過啲咩,有冇異狀,未必可以清楚同人交待。機器唔識講大話,住所安裝咗傳感器,長者生活嘅起居,幾時去廁所,去幾耐廁所,幾時煮飯,幾時訓覺,完完全全無所遁形,好適合用於照顧獨居老人。

當我嚟到英國,發現呢邊居住環境,同香港好唔同,智能家居sensor,其實有數之不盡嘅 use case。係英國住 house,唔會有保安員,咩都要靠自己:警鐘、煙霧感應器,只係好基本,防盗 cam 都係必需。此外成日上落樓梯,要有識得感應移動、按時(例如日落)開關嘅燈具,亦變咗好重要。

Google嘅智能speaker有個功能,就係佢知你幾時係屋、幾時外出(因為你部手機俾咗 permission 佢),可以自動幫你啟動預設指令,例如定時開燈扮有人。但其實。唔需要透露個人行踪,屋企裝咗創辦人S嘅傳感器,亦自然知道,間屋幾時有人幾時無人。

香港有唔少智能家居,或所謂智慧城市嘅初創,但其實大部分,都係用緊人地嘅技術,少有好似創辦人S,喺香港發明世界級工藝嘅原創技術。創辦人S要籌錢,照計無難度,但撞正疫情唔可以周圍飛,反而刺激佢簽下巨額B2B訂單,嚟緊一段長時間無資金煩惱,可以話因禍得福。

尹思哲

http://linkedin.com/in/wanszezit

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner