【笑到最後】港股更適合All in派 - 高明

更新時間 (HKT): 2021.06.07 02:00
■過去6個月,港股示範咗「齊上齊落」,就係ATMXJ為首嘅股份(除咗阿里巴巴),6個月股價走勢,好似同一幅圖咁,食緊同一個升跌幅。 資料圖片

過去半年,港股美股都可以話係經歷咗一次「牛三」,兩者最大分別在於,港股股價嘅單一化十分嚴重。

港股曾經係特別單一嘅市場,由早期全年淨係升濠賭股,到2017年嘅牛市,真係升嘅股份只係得騰訊(700)、平保(2318)嗰啲。近年多咗啲高增長股,港股板塊叫比較齊。

坊間間中都會排足球陣嚟比喻股份。公道啲講,拎11隻港股同11隻美股打正選,去到2021年呢一刻,港股嘅陣其實都唔太差,有啲概念雖然始終香港係冇,但美股撇除中概股的話,又冇中國獨家經營屈機概念,Big Techs再大,都互相搶對方市場,例如Google搶蘋果OS市場,到近年又打雲端市場,而基本上每間Big Tech都爭住做遊戲電影平台。所以論霸權穩定性,永遠都係中概贏。

若果數缺點,同一個陣排到B隊,港股已經開始要搵永遠唔郁嘅乜行物行,反觀美股B股,未計科技股及晶片股等等,如果銀行對銀行,美銀加富國銀行今年升幅輕易取勝。經歷今年連傳統股都狂炒,老將都可以翻生再踢,例如巴郡亦由舊年廢老股變返做有着泳褲股,甚至有外援例如德國BioNTech及荷蘭ASML。

過去6個月,港股示範咗「齊上齊落」,就係ATMXJ為首嘅股份,除阿里巴巴(9988),6個月股價走勢,好似同一幅圖咁,食緊同一個升跌幅。相反,FAANG到三大指數都係各有各。

留港股定係去美市做「二等股民」(冇得抽IPO),都係各有盤數,港股食ATMXJ餐都係食緊同一個餐,但勝在「穩定」;相反,美股有得揀,開放代價係面對殘酷競爭。唯一可以肯定,係美股生活成本低,蘋果最平一手1,000港紙有找,喺香港買輪都有啲困難,所以話,走嘅都係「窮X」,啱唔啱先?

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner