【智取大市】低估值復蘇股抗滯脹 - 晉佳

更新時間 (HKT): 2021.06.07 02:00
■好孩子上周一炒三胎政策消息狂升三成,跟住股價急回兩日,低位有承接,上試2.4元相信難度不高。 互聯網圖片

上回提到中央唱淡人民幣,反映中央預期人民幣唔會大波動,亦唔預期因貶值而同時發生市場危機,市場驚嚇位已經少咗一大半。經過一星期睇返轉頭,暫時睇法啱唔晒,至起碼股市先升後回,市場風險胃納未明顯提升,或許市場理解中央嘅舉動係為咗應對滯脹,投資者繼續投以滯脹預期──即通脹加衰退預期下,會影響長線投資者爭取回報嘅能力,所以取態仍審慎。

呢個局勢點樣影響資金流?較大可能係大部份股票走弱、小部份走強,國策股、通脹受惠股較受歡迎,最好配以低估值兼有穩定盈利能力,之前喺IG推介嘅好孩子(1086)係一個選擇。

好孩子舊年下半年收入回升5.6%,盈利2.02億,年化PE 8.6倍。今年首季,好孩子收入按年增長27.2%至20.85億,創第一季歷史新高,足證持續復蘇。雖然原材料成本上漲,但BB車嘅需求彈性低,戰略品牌佔收入逾八成,成本轉嫁能力高,呢點喺過去低潮期毛利率仍保持四成以上體現出嚟。走出貿易戰嘅低潮期後,今年估計能夠自2018年以來重啟派息。

好孩子上周一炒三胎政策消息狂升三成,跟住股價急回兩日,大戶獲利後,低位有承接,上試2.4元相信難度不高。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner