點止冧巴咁簡單|長飛H股較A股折讓過大(古天后)

更新時間 (HKT): 2021.06.09 17:48

受惠憧憬華為於IoT加大佈局,而華為較早前已推出自家嘅手機操作系統鴻蒙2.0,市場憧憬有助加快5G應用,刺激5G概念股近日炒起。目前5G概念股股價較低殘,但喺華為加大佈局下,板塊或不時隨消息炒上,5G股氣氛或受提振,可部署吼位跟炒。

發展5G為全球趨勢,可惜本港上市嘅5G股走勢表現強差人意,以長飛光纖(6869)為例,2018年初於40蚊見頂後,跌足3年有多,市值蒸發四份三,叫小股東情可以堪。長飛為全球光纖光纜龍頭,技術當然係首屈一指,可惜一直依賴國內市場,2019年海外收入佔比僅21.4%,收入來源集中,集中採購一出就對公司營收帶來巨大衝擊。

2019年光纖光纜降價近50%,2020年均價再劈30%,兩年合共跌價65%,堪稱對行業極限施壓,生產技術唔高,成本控制唔理想嘅二三線同業當然大量被淘汰,作為行業龍頭嘅長飛,捱過呢一轉洗牌,供應減少配合需求回升,就算嚟多來一次集中採購,降價壓力亦會較輕,有利經營狀況谷底反彈。

而公司喺過去兩季收入強勁,第一季毛利率更有改善,毛利率正步向穩定,現時炭纖價格低,但公司仍有利可圖,保持盈利,相對較多同業表現已勝一籌。公司繼續喺多個業務多元化,公司最近建立了一項基金,投資於電子材料跟複合半導體,公司先前已經投資了一家矽片生產商,預計可為公司長期進入呢啲業務鋪平道路。

今年首季,長飛業務大復蘇,營收19.11億元人幣,按年大增36%;純利0.75億元人幣,扭轉去年同季虧損0.16億元人幣局面。全年盈利預測7.09億元人幣,回增30%,較2019年仍有10%距離。預測PE 8.6倍。過去3年,最高PE 20倍,最低7.3倍,平均12.4倍。今年預測PB 0.64倍,過去3年,最高PB 3.6倍,最低0.63倍,平均1.37倍。

相對國內同業天孚通信(深:300394)預測PE 28.4倍,PB 5.85倍;光迅科技(深:002281)預測PE 28.7倍,PB 2.37倍。身為龍頭嘅長飛,估值相對同業大幅折讓,估值可以話平到跌渣。即使跟本身A股(滬:601869),H股亦較A股現價24.25人民幣,大幅折讓近7成。以過往長飛H股平均較A股折讓5成,若回復呢個折讓比例,H股股價可見14元。而最近中金跟高盛嘅報告,分別給予目標價18元及15元,若以大行報告下限目標價9元,再拉個平均價13.5元,跟H股折讓跟A股收窄至5成相近。10至10.2元收集, 跌穿9.5元止蝕,上望首目標12元,下一目標為13-14元。

-----------------------------

蘋果App大升級 更簡潔更就手!了解更多立即下載體驗

-----------------------------

點擊即睇《Bitcoin投資入門手冊》

一書盡覽新手必讀資訊

-----------------------------

【全球樓行】 Dream House零距離

屬於香港人的移民攻略

關心你飯碗,貼近你生活,即Like「蘋果ATM」FB專頁!
BannerBanner