【智取大市】如何不被CPI震走 - 晉佳

更新時間 (HKT): 2021.06.11 02:00
■個股繼續輪流炒,如果因為驚美股CPI數據而唔敢入市,望返轉頭,一批長線具投資價值嘅板塊,已經飛到唔知去乜位。 資料圖片

美國昨晚公佈5月份CPI數據,執筆時全球市場腳震震,輿論似乎相當關注通脹、滯脹問題。投資者究竟係咪嚴陣以待?恒指連跌第七日、成交逐步縮減,的確有幾大影響。不過,個股繼續輪流炒,如果你近一個星期一路喺度驚一粒數據,因此唔入市,你望返轉頭,航運股、部份低估值科技股、新能源股等等,一批長線具投資價值嘅板塊,已經飛到唔知去乜位。如果中長線投資,其實只需要避開大跌浪,例如類似舊年3月嘅環球股災,其餘時間,將好股揸實就OK。

換轉幾年前,恒指連跌7日,好多股都會跟跌,但係投資者越嚟越精明,去到𠵱家呢個年代,股市指數跌,只係代表某啲股票形勢不利,例如人行唱淡人民幣,令內銀股表現走弱,不過,美債息下跌,優質周期股又有得升,投資者懂得分辨唔同行業、唔同股份面對唔同嘅環境,即使喺同一時間點都會有向好有向壞,冇咁容易一時三刻受到市場氣氛左右。

優質股,投資者會選擇快人一步買得到,令到股票價格往往喺時間上超前好多去反映未來嘅基本因素。如果驚住粒人人都驚嘅CPI數據,而嚴重影響到投資部署,就想做長線少少嘅投資都好難了。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner