› 選擇地區
三藩市
紐約
洛杉磯
其他美國地區
香港 台灣 北美
 
2018年03月06日

操盤手札記:波動市狗股尋寶 - 割柑人

華潤電力係十大藍籌高息股之一,業務穩定,可攻可守。互聯網圖片

美國總統特朗普燃點貿易戰火頭,引發環球股市波動。特朗普引爆貿易戰,估計唔係單純針對邊個國家,而係想推翻既有嘅全球化、多邊貿易關係,喺國際貿易秩序改變,外匯市場隨之改變時,重建美元霸主地位。
貿易戰當前,加上加息有快無慢,港股失守三萬關,收29886,跌697點或2.3%。1個月美元、港元拆息息差擴闊至0.98厘,創近10年新高。香港近10年嘅超低息環境相信就快玩完,投資港股嘅槓桿會唔會逐步減少,值得關注。
近排大市單日波幅郁吓都幾百點,沽壓未除,撈貨勿急。3月係業績高𥧌期,若果大市進一步調整,拖低績優股表現,反而係執平貨機會,不妨揀定好股,候低吸納。操盤時亦唔使急於重倉某一股份,股市築底往往唔係一氣呵成,而係反覆波動,資金要合理分配,分注吸納。
波動市揀股,可參考美國基金經理Michael O'Higgins喺1991年提出嘅狗股理論(Dogs of the Dow Theory),即係年初買入道指成份股中十大高息股,翌年比對新嘅十大藍籌高息股,跌出榜嘅就沽,新上榜嘅就買。據統計,平均複利回報達18%,大幅跑贏市場平均嘅3%。
套落港股,以預測息率計,係:中移動(941)、港鐵(066)、華潤電力(836)、中石化(386)、交行(3328)、匯控(005)、神華(1088)、金沙(1928)、招商局(144)、中行(3988)。當中較吸引我嘅係潤電,除咗有高息打底,業務亦穩定,可攻可守。
潤電預測息率為6.5厘,現價13.44元,走勢上,10天線升穿20天線,出現黃金交叉。前周,中國電力企業聯合會發表報告,喺綜合考慮宏觀經濟、服務業及居民用電發展趨勢、大氣污染治理、電能替代等因素後,預計今年電力消費將延續舊年平穩較快嘅增長水平,全社會用電量料增5.5%。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載