› 選擇地區
三藩市
紐約
洛杉磯
其他美國地區
香港 台灣 北美
 
2009年09月18日

青心直說:瑞安無令人失望 - 胡孟青

此欄早於8月24日題為「瑞安超筍遲早被發掘」推介過瑞安建業(983),文章出街後股價見過10元後,一度被洗到穿9元,當時以為自己睇錯,原來係唔受老散玩,「未出發,先震倉」。
當時立論理由簡單到不得了,就係瑞安12年前9蚊,12年後又係9蚊,冇理由以超高折讓將喺倫敦AIM上市的中華匯私有化後,資產淨值仲係得9蚊。結果呢次羅康瑞真係一洗忍者龜輸錢嘅頹風,重新以水泥、瑞安房地產(272),及中華匯的爛尾樓三條腿重新上路,成功將瑞安每股資產淨值提升到19元,單睇面價,瑞安現價仍有40%以上折讓。
尋寶遊戲正式開始,現時市盈率升到6倍,雖然係平通街,低於安徽海螺(914)31倍、富力地產(2777)13倍,但一輪短炒後,增長動力又有幾大?
睇番瑞安上半年業績倒退9.9%,當中營業額實增13%,盈利倒退主要係冇咗去年來自可換股債券及出售瑞房帶來的6.6億元特殊收益。不過今年上半年有另外6.48億元私有化中華匯的折讓收入補番數,令整體盈利保持7.9億元。

手頭有錢短期唔使集資

大家可能會諗,特殊收益唔係年年有,點解係「亮點」?先睇中華匯土儲,目前13項目發展中,主要分佈喺包括北京等6個主要城市,可發展樓面面積超過204萬平方米。當中有3個位於北京、成都及重慶項目將於明年落成,集團話今年底會開始預售,加埋都有近26萬平方米。集團到2014年陸續有項目落成,加埋早前買入北京朝陽區地王,未來貨如輪轉唔成問題。根據中期業績,中華匯發展中待售物業估價超過43億元人民幣,總資產值超過51億元,所以令每股資產淨值急升。
由此可見,賣樓將會變成主打,瑞安已成功變身內房股。但下半年大部份賣樓收益未必可趕及入賬,預期仍要靠水泥同8.7%瑞房股權頂住先。睇番中國西南部水泥業務,雖受四川地震破壞部份生產線,需求仍受西部大開發支持,價量齊升,令上半年仍能錄得39%盈利增長,跑贏其他水泥股九條街。
仲有一點可以放心,係上半年派息減半得番0.1元,集團話要準備投資新項目,既然口袋有錢,短期未必咁快向股東伸手。股價現已擺脫弱勢,短期整固後有機會爆上11.2元阻力水平,與其賭博,不如買實淨放心股,起碼瞓得着覺。
胡孟青

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載