› 選擇地區
三藩市
紐約
洛杉磯
其他美國地區
香港 台灣 北美
 
2010年11月05日

中環在線:陳德霖終於「處女升旗」 - 李華華

《德霖小館》
陳德霖昨「處女升旗」(圖),令大家好懷念當年聽任總提點嘅時光。

花旗佬嘅QE2帶挈新興市場股樓齊升,無厘頭仲帶挈埋華華晨咁早開工!件事係咁嘅,以往但凡地球上有任何金融動盪風吹草動,「金融沙皇」任志剛就會晨早7點幾開工之前,響金管局樓下(國金中心大堂)set晒咪stand同大家講話,分析吓最新外圍形勢,呢個情景大家一定唔會陌生,而響傳媒軼史上,大家稱之為「志剛廣場升旗禮」!

雷曼爆煲 任總朝朝解畫

咁新人事新作風,「攞命陳」陳德霖舊年10月上馬後,唔知係咪冇乜嘢同大家分享,所以,大家已經好耐唔睇升旗!家陣佢可能覺悟到地球立立亂,係時候出嚟畀世人一啲指引,所以,前晚深夜睇完QE2出台,噚日晨咁早都要見見大家,唔計第一日返工同大家講早晨,呢鋪應該係佢「處女升旗」!
尤記得當年雷曼爆煲,任總差唔多朝朝升旗穩定人心,咁都唔止,05年「7.21」人民幣一次過升值兩個巴仙,當時市場消息禾雀亂飛,佢啱啱喺北海道夜機返到香港,都二話不說晚頭9點幾升旗,為眾生解開謎團……陳總,經噚日一役,「志剛廣場」將易名為「德霖小館」,記得勤啲開鑊呀!
李華華

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載