食字部:一叮叻沙麵 正過出街食

更新時間 (HKT): 2013.05.29 05:20

即食麵,細個時阿媽話佢好邪惡,但不知為何,即食麵這個邪惡產品已由次文化變成了主流。美國網站The Ramen Rater(即食麵評論),近年公佈的十大全球最佳即食麵,漸成年度大事。新出爐的十大,香港至少找到五款,一齊試試,是否實至名歸!

記者:何兆彬
攝影:潘志恆

得獎即食麵 即叮即試

是日找來903的朱薰、細So及C君這三位大忙人,見面即問三位有無入廚,異口同聲答無,咁即食麵呢?個個都有見解喎!C君:「谷德昭教過我,用鮑魚汁撈即食麵,好好食!我試過真係得,但再見到佢時,佢又話無教過我!」三人主持新節目《好出奇》集集度新橋,又話搞Apps又話做生意,做廚有無得諗?C君:「有!回收人家罐頭鮑魚的鮑魚汁,用來煮公仔麵,隨麵的調味粉可以完全不用,我有諗過做呢門生意!」朱薰:「咁我回收你的味粉,可以成另一門生意!」 C君:「我仲有個小秘訣,是舊同學教我的,淥好麵的同時打進一隻生雞蛋,蛋汁撈在麵身上,會十分滑!我試過,真係得!」說再多也沒用,行動最實際。今次在商台試食,但原來商台沒爐頭,只有微波爐。網上流傳微波爐叮麵也有技巧的,先叮水,撈粉,再加麵叮一分半鐘,然後把麵餅撈散,再叮分半鐘!一齊睇吓試食結果。

百勝廚叻沙麵 朱薰最撐

百勝廚來自新加坡,在是次十大即食麵排名中,佢包辦了頭兩位,認真巴閉。試食時三人不知排名,但朱薰一揀就揀了叻沙麵,打開包裝就叫:「嘩!這個一打開就好香!認真的,不騙你!」細So搞笑:「聞都聞到有口感!」 C君:「你死喇,蘇施黃就在附近!」叻沙麵有兩包味粉,一是橙紅色的叻沙粉,一睇就知辣,另一是白色,朱薰:「這是椰粉!」分開包裝,食客可自己調配辣度,細心值得一讚。叮完馬上試食,點知朱薰試完又試,夾完又夾:「嘩,呢個麵好煙韌!」C君唔執輸:「好正喎,估佢唔到!」朱薰:「呢個真好味,我會買畀我老公食!」細So:「你太誇張!等我試吓先!」咬了一啖,忍不住暗叫:「好似仲好食過街外的叻沙麵。」眾大笑!咦,你三個唔係剛剛食完飯咩?「我哋三個剛去完飲茶咋!」

黑版辛辣麵 vs 百勝廚咖喱麵

三人試完叻沙,即選上黑版辛辣麵來試,因為紅版本身已Fans多,黑版則較為少見。朱薰:「我阿媽去韓國會買一箱回來,她說韓版更好吃!」 C君:「我最喜歡吃辛辣麵!」但紅版辛辣麵人人都話辣,黑版賣點一是其「牛骨雪濃湯味」,又稱此麵研製了三年,不含味精。Black黑版辛辣麵內有三包材料,分別是香菇碎、紅辣粉及味粉。講真,即食麵始終係假味,Black宣稱使用大量的大蒜、牛骨、脫水白菜、大葱、香菇、胡蘿蔔、辣椒和牛肉,試吃時只下了大半包辣粉,食落不但不太辣,味道比較「真實」,麵質也比普通級數的即食麵彈牙有咬口,C君試勻三種麵,大叫這個好吃:「紅版的辛辣麵我家有一箱,但呢個真係好食!的確如你所說,味道比較真實!」朱薰:「無紅版咁辣,這個好好味,但我還是會選百勝廚的叻沙麵做冠軍!」百勝廚咖喱麵雖然排行第二位,但這個麵生不逢時,是三人最後測試的一個麵,稍稍被冷待了,而且他們評價也不太高,細So:「這個麵,跟叻沙太似了,又係有一包椰粉,但不如叻沙出色。」

專業西廚:冠軍贏得合理

找DJ試過後,再找來廚師評評,酒店西廚Kevin:「冠軍的叻沙味的確不錯,麵身沒有炸過,吃完不會口乾,比日本即食麵更出色。亞軍的咖喱味就比較普通,它用的是傳統新加坡咖喱口味,跟叻沙味有點相似。雖然百勝廚的即食麵較貴,但其實算合理,不過我就唔會買,因為份量較細,吃一個不飽,反而會買百勝廚出的湯包,從前我在德國居住時買過不少,它有出海南雞湯汁、咕嚕肉湯汁等,在外國頗出名!」

狂迷喪評即食麵

The Ramen Rater是由Hans Lienesch主理的即食麵評論Blog,他聲稱自12歲起就愛上即食麵,起初,他只迷上了營多撈麵,並開始在網上寫有關即食麵的評論。到了2010年,他搬到兩間巨型亞洲超市附近,不斷評論各式即食麵,麵廠也寄上新產品給他試味。去年,他推出年度十大即食麵,成了網上熱話,今年再出,網上依然熱鬧,以香港所見,冠亞軍的百勝廚即食麵幾乎全面斷市。

Ramen Rater 2013年十大:

售賣點:永安百貨(2710 6288) 

果然好玩 籽在四方,即like「果籽」FB專頁!
BannerBanner