【校際電競】港大BBA女生搞大專聯校電競 畢業後都要做呢行

更新時間 (HKT): 2018.08.04 00:05

記者每次報導電競,都一定有留言話:廢青、loser、打機嘅藉口,正就讀香港大學BBA(IS) year 2 的Gabriella(梁雅姿)就唔係咁睇。早在5年前,香港還未有太多人提及「電競」之前,她已和朋友成立了香港學生電競總會(HKSESA)。每年舉辦的聯校電競比賽,全靠他們奔波說服中學、大專校長簽署同意書批准學生參賽,電競圈人稱她為Gab姐。Gab姐覺得不少電競選手比大學生更清楚自己,有夢想、有熱血,希望畢業之後仍然能從事電競相關的工作。

「我打機其實唔叻,當初成立HKSESA係因為自己幾鍾意打《英雄聯盟》(LoL)。」當年在中學搞學生會,Gab姐參選政綱就提到要舉辦聯校《LoL》比賽,不過校方反對,Gab姐覺得要兌現承諾,於是和朋友組成了香港學生電競總會(HKSESA)。「當時其實沒有那麼正式,係自己想玩,所以搞咗個聯校比賽。」當初因為要跟校方斡旋,才開始了解電競行業,往後覺得校際比賽能更有效向大眾宣傳電競,一搞就搞足5年。「搞校際比賽要校方同意,初初都覺得係搞打機比賽,乜都唔識,但了解多咗電競呢個行業,先覺得坊間有好多誤解,校方有唔清楚嘅地方,亦真係有學生覺得做選手打吓機就可以賺大錢。搞公開賽可能純粹鬥打得好,舉辦校際比賽,無論校方定係學生都可以多啲了解電競。」

爭取學校同意打電競唔容易,HKSESA的比賽一般先是由參賽者報名,再由HKSESA向校方聯絡和簽同意書。「試過有同學口頭上得到批准,但後來追究,現在所有校際比賽都要校方簽名。亦都有試過有同學想搵校長簽名,校長唔想直接拒絕,索性扮唔喺度避開同學。」今年聯校電競大賽來到第三屆,50間中學和大專院校參加隊伍入面,約有20間得到校方參賽同意,數字上仍須努力,但部份學校態度明顯變得開放。「天水圍一間中學是直接由老師報名參加的,我們去學校時也不用做presentation,甚至校方主動邀請我們開講座,講解電競行業前景。另外,也有幾間中學已經有電競學會,其中一間電競學會的會員更破了紀錄,有200多人參加。」

舉辦電競活動,Gabriella最有滿足感的是看到改變。「睇到一啲學校由最初唔接受,慢慢了解同改變,好有滿足感。」莫說記者寫電競,搞電競比賽,也例必有負評,不過在Gab姐眼中,電競選手不會比大學生低質。「我好鍾意從事電競嘅人,佢哋好清楚自己追求啲乜,反而好多大學生入咗U都好迷茫,點解揀呢間U、點解揀呢一科,其實都未清楚。」從事學界電競5年以來,她也見到很多有能力的選手,學業上有能力應付,只是為了夢想而早點投身職業電競。「係有人為咗逃避而想去做電競選手,但真正做到職業的電競選手,背後都付出很多努力,我自己都見証過幾位選手,依家去咗國外做職業選手,佢哋未成為職業之前已經好畀心機。」雖然讀工商管理,但Gabriella思維一點也不商業,喜歡電競界夠單純、夠熱血。「揀得做電競,都知搵唔到大錢,冇咁多商業世界嘅勾心鬥角。」日後畢業後也想從事相關工作。

雖然大讚電競選手電競夢,但Gab姐也有嘮叨要發,她覺得電競是多了人談論,但香港人總是不撐自己人。「好多人都會睇外國最top的選手,但總看不起本地選手。其實也有很多香港選手在中國、台灣等地做職業選手,但香港老闆卻不願投資香港男子隊。」當然,各處鄉村各處例,香港或有先天不足,但Gab姐希望由大眾風氣開始改變,觀眾能多點支持本地選手,看到欣賞的直播時,考慮一下捐款支持其實不會少一塊肉的。

電競行業,並不是只有電競選手,Gab姐這類有心電競搞手亦值得大家給予鼓勵。第三屆聯校電競大賽(3rd Joint-School Esports Competition)決賽將於8月5日於數碼港舉行,免費開放給觀眾入場,想支持這班熱血學生搞手和選手的話,記得入場了。

即Like全新飲食專頁【籽想好食】: https://www.facebook.com/food.appleseed/

果然好玩 籽在四方,即like「果籽」FB專頁!
BannerBanner