【即時文摘】馬時亨金句(左丁山)

更新時間 (HKT): 2018.12.20 00:02
(蘋果日報)

港鐵主席馬時亨出席沙中綫調查委員會,講到特首林鄭月娥好嬲港鐵公司提交報告內容失準,點名要求五名要員辭職,包括行政總裁梁國權在內。純講管理權力,特區特首冇權將港鐵要員炒魷嘅,但港鐵嘅大股東係政府,港鐵董事會內又有幾位高官,林鄭特首要發威嘅話,港鐵董事會那敢不從?好快就根據正式程序開會一致通過,即時解僱之,香港仍有人治色彩也。於是四位高層自動請辭,叫做有啲體面,估唔到馬主席公開爆料,以後人人記住梁國權、黃唯銘、李子文、黃智聰、Aidan Rooney(胡宏利)係被辭職嘅。

上述只是馬主席爆料啫,馬主席之最好聽之金句就係:「我做過六年局長,我估政府能夠容忍無能力嘅人,但佢哋唔能夠容忍唔準確嘅報告。」嘩嘩嘩,馬局長真係夠率直,夠坦白,唔怪得政府內有不少尸位素餐,只識做人肉錄音機之人可以佔領高位。小G要求左丁山講解馬時亨所說之要義,於是為呢位後生上一課。

馬主席即係講,你做部下,無能力冇乜緊要,政府內多的是,但最緊要識寫字,識字就懂得寫報告,報告第一要義就是內容資料準確,數據無差錯,合乎事實。至於如何解釋數字數據,寫幾項畀上司參考就得,上司自會識得隨機應變,視乎記者所問,講甚麼理由都得,帶記者遊花園係高層必懂伎倆,因為數字不能錯,意見則人人不同,吹牛各有理由吖嘛。最撞火嘅係,你寫報告連數字數據時間都有疏漏,等上司面對傳媒、議員時,畀人斷正,難以反駁,咁鬼冇面,唔嬲死寫報告之人就係假嘅。故此做官也好,做大公司職員也好,必定要識寫報告,數字數據時序三樣嘢絕對不能錯。否則必然「燉冬菇」,唔炒魷都一世難升級。小G話明白晒,但仲要問多句:「我識寫報告,但唔識執行做嘢,咁又點」。唔識執行,屬人民內部矛盾,上司自會安排一個有經驗識做事嘅人去執行,你唔識做可以排隊尾等升級,但唔識寫報告令上司出洋相,就冇得留低!馬時亨讀港大時冇乜上課,鎮日在新法書院教書賺錢交學費及生活費,街頭智慧爆燈,73年畢業之後,又在銀行界、證券界、商界、官場任高職40餘年,工作及人生經驗豐富到極,佢呢句金句,所有新畢業生,新AO都必須記到熟。在馬場包廂見到馬主席之港大同班同學,佢話馬同學醒目過人,有人問馬主席再做局長好唔好,馬先生答:「我壞咗腦就會應承!」真明白人也!

果然好玩 籽在四方,即like「果籽」FB專頁!
BannerBanner