【即時文摘】芝大香港課程(左丁山)

更新時間 (HKT): 2018.12.31 00:02
(蘋果日報)

芝加哥大學在摩星嶺白屋之香港校園,由馬會及袁天凡李慧敏夫婦捐巨資興建,完全活化一個港英時代之政治囚禁地方,兩位華裔建築師(可惜皆在校園揭幕前逝世)之樹屋tree house設計概念,創意非凡,令人嘆為觀止。當然,若非有馬會及袁氏夫婦捐錢,呢個校園係冇可能起得咁靚嘅。香港市民雖未必可以入芝大讀EMBA(學費不菲也,且收生要求亦高),但平時可留意芝大學者特別來港主持一啲免費公開演講,本港學者不時亦應邀在此講專題,大家如留意上網,可選擇有時間便到摩星嶺芝大一行,除咗聽講座有益之外,在校園欣賞香港西環外無敵海景,誠賞心樂事。

芝加哥大學在港設立商學院分校Chicago Booth,當然係着眼亞洲市場,有大量中國大陸學生申請入學,但同時亦設立固定配額畀香港學生及外地學生入讀,務求學生國際化,有一定之國籍、性別diversity,此乃美國精英大學之一向收生準則,至於課程及師資方面,保證與芝加哥之Chicago Booth完全相同,並無分別!

幾個星期前,有一位芝大教授來港主持一個討論會,講兒童學前教育,左丁山得知後,通知一位直資小學副校長,佢立即報名參加,之後對左丁山講:「的確係名師,令人開眼界,學到新概念。」芝大得到摩星嶺白屋呢塊地(據星島日報報導,明德學院與芝大一齊入標,結果芝大中標。好彩啫,明德學院就嚟散校咯!)曾承諾除興辦Chicago Booth之外,會推出不同形式之課程及講座、研討會畀本港教育界、NGO及社會人士參加,多數不收費。因有此承諾,故此馬會願意捐錢,袁天凡夫婦肯捐錢當然係袁兄係芝大畢業生(1975經濟)之故。袁兄係芝大校董,歷年來捐款回饋母校,人所共知,佢唔單止捐錢畀芝大,對母校中學九龍華仁亦好大力捐輸,自己之外,不停組織九華校友出錢出力,為九華辦小班教學,財經界之九華校友如吳天海、邢李㷧、張漢傑等等等便在袁天凡號召下,為母校集資!

之不過,講開芝大教授來港,最近因發生「閃靈事件」,入境處以後會唔會過問芝大教授有乜特別技能呢?准唔准佢地入境呢?入境處會唔會大細超,閉上雙眼睇唔到摩星嶺有美國教授教學或演講呀?

果然好玩 籽在四方,即like「果籽」FB專頁!
BannerBanner