燕雲台劇評|古裝爛劇佘詩曼唐嫣演技高下立見 捧遼貶宋楊家將變反派激嬲小粉紅 ——佟傑

更新時間 (HKT): 2021.01.13 00:03
佘詩曼、唐嫣等主演的《燕雲台》號稱歷史正劇,但歷史感好低。

日日屈在家中抗疫,少不免左睇右睇,呢幾日唔知算好唔好彩,畀我睇到唐嫣同埋佘詩曼。「食慣魚翅都要食碗仔翅」,睇完《今際之國的有栖》、《男排女將》,大河劇《麒麟來了》又睇到心灰意冷少少爛尾收場,連舊片《謀聖鬼谷子》都睇埋,結果悶得滯,就睇完咗《燕雲台》,點知就「食X食着豆」,有啲後國安法時代仲有票投嘅錯覺。

「燕雲台?好好睇喎,佘詩曼好好戲,喊戲功架十足,滴眼淚有漸變㗎,同譚凱做對手戲,真係好感人,前日落街市買芫荽嗰時,同菜擋阿邊個傾開都話好好睇,學到好多遼國歷史。」有次去咗湯文亮食開嗰間茶餐廳,個老細咁講。

邊個係譚凱?同福山雅治差唔多年紀嗰個?唔知呢,但我一聽到芫荽就毛管戙,乜芫荽唔係送㗎咩?關心芫荽可能重要過《燕雲台》,不過睇完《燕雲台》真係爛到忐忑,我同佢講,「睇都睇唐嫣啦,張藝謀寶貝聽過未,《天之痕》獨孤寧珂聽過未?」茶餐廳老闆突然好似品評Windows XP年代YoYo咁:「嗰個小妹妹,啲戲好屎啫。」

《燕雲台》本身係蔣勝男歷史小說原著改編,「宋遼夏三部曲」其中一部,如果有睇過《羋月傳》,會知道《羋月傳》電視劇同原著有唔少出入而惹來劣評,據了解因為咁《燕雲台》係蔣勝男有份親自改編,不過事實亦證明好作者未必係好編劇,此劇在內地劣評如潮,在比較有水平的評分網站,被劣評4.6分不特止,仲有人問點解會咁高分,原來係有4.4底分,所以成個製作,整體只有0.2分云云。

咁低分有幾個原因,第一當然係唐嫣做蕭太后,蕭太后何許人也?乃攝國政,有軍政才略,為契丹(遼朝)與北宋達成澶淵之盟嘅女強人,如果從「一中」角度,就係遼國「武則天」了。 但唐嫣向來是做「大女主瑪麗蘇」角色,「瑪麗蘇」(Mary Sue)出自上世紀80年代的同人小說,被挪用來意指過度完美,卻蒼白膚淺的角色,意思是唐嫣一向做開花瓶(內地用語是傻白甜)供少年幻想,但蕭太后巾幗不讓鬚眉,同唐嫣完全唔夾。蕭太后望着燕雲台萬馬千軍都直衝,再沒有支援,還是有這點英勇,至少都應該楊千樺做,點可能由唐嫣來演?

第二係 《燕雲台》號稱歷史正劇,但其實歷史感好低,決定遼國命運的「祥古山之變」輕輕帶過,好多場面都無咗,所謂制度改革,根本得幾句台詞;寫遊牧民族,帳篷卻有地磚,兩鏡就轉入宮殿,篝火跳舞仲頹過深圳的錦繡中華民俗文化村表演,雖然當時遼國都應該漢化咗,但內地觀眾都分唔到係咪遊牧民族,純覺得在看宮鬥劇,失敗中的失敗。至於蕭太后與韓德讓在正史野史裏的發揮空間很大,但竟然變成偶像劇「唔小心跌低Kiss咗」等的關係,令人完全無法接受,所以有人覺得只係另一套《長安諾》、《孝莊秘史》咁囉。

第三係,一黨獨大點解仲會有遼國呢?《燕雲台》故事歷史背景係燕雲十六州,簡單講,就係糊里糊塗被分裂出去嘅國土,後晉皇帝石敬瑭割讓予契丹的,而蕭太后就係捍衞遼朝「抗宋」嘅英雄,靠與宋議和維護「打下」的燕雲十六州。但小粉紅眼中點可以接受遼國觀點「守護」燕雲十六州?楊家將成為了反派,怎麼行呢?蔡英文怎能守護台灣?《花木蘭》怎能幫美帝打仗做Disney+急先鋒?劉亦菲和唐嫣若叛國都肯定要被「射鬼箭」(將罪人綁在柱子上用亂箭射死)。

可能因為咁,《燕雲台》好多政治位都避重就輕,政變少而情戲多,但情戲又不如《知否知否應是綠肥红瘦》,歷史感不如《清平樂》,所以,此劇最後賣點,就只剩下佘詩曼和譚凱了。我同茶餐廳老闆講,《燕雲台》連內地人都覺得無賣點,同掛住百年老店「羊頭」,端出來的卻是一碗油膩膩粉麵一樣,點會好食得過你個B餐呀?老闆聽完,好似領悟到啲嘢。

撰文:佟傑

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

果然好玩 籽在四方,即like「果籽」FB專頁!
BannerBanner