› 選擇地區
三藩市
紐約
洛杉磯
其他美國地區
香港 台灣 北美
 
2013年07月24日

賣百佳 - 左丁山

華爾街日報在七月二十日報導和黃有意出售百佳,已聘請高盛及美銀美林為財務顧問,找尋買家。隨後和黃發表聲明,指旗下屈臣氏集團是對「百佳」為主要品牌經營的超級市場零售業務進行策略性評估,以期為股東帶來最大利益,不會為評估設定完成日期,亦不保證達致任何交易。
換言之,市場猜測和黃會賣百佳,和黃只係話做零售業務評估。一般坊間意見以為百佳分店多,生意大,一定好好賺,利錢滾滾而來,和黃點會肯賣呀?本欄就講過好多次,全世界嘅超市,包括沃爾瑪、家樂福、百佳、惠康等等超市,稅後盈利率只在2%至4%之間,全靠薄利多銷,並非利錢豐厚嘅生意。百佳在香港有345間分店,2012年之市佔率為33.1%(惠康佔39.8%),2012年銷售總額達217億港元,利潤未見透露,但華爾街日報話如按照牛奶公司(新加坡上市)之2013年市盈率29.5倍及2014年預測市盈率25.9倍計,百佳市值可達30億至40億美元,咁講法,推算返轉頭,百佳嘅利潤大約係一億至億五美元之間,佔和黃集團利潤之百分比,微不足道,但營業額217億,係集團總營業額3954億5.4%,充份證明百佳生意雖大,利潤貢獻甚微,百佳係和黃嘅瘦雞肋,賣不足惜。
以MBA課程一個產品分析工具BCG Matrix嚟睇,百佳超市在集團內係低增長、高市佔率嘅業務,在明星、狗、問題兒童及現金牛之矩陣中,算係現金牛,因此業務不需要太多新投資,並可提供現金流給其他業務單位運用,尚有保留價值,不過在今天銀行水浸及超低利率時期,現金流對和黃之邊際價值,已降到極低水平。BCG Matrix自1970年面世以來,雖然飽受學術界批評,話係過份簡單,不少MBA營銷學課本已經將呢個概念摒除,但矩陣之四大分類早已深入四、五代管理人腦海中(每十年一代),且勝在簡單易明,可以幫助我地了解一啲「業務評估」現象。高盛、美林如替屈臣氏集團評估所有業務,或會利用埋GE / McKinsey Matrix,不過呢個矩陣其實過份複雜,內裏還含不少主觀判斷,似乎理論多過實際,唔係個個公司董事能夠明白、掌握嘅。
(小註:明星(Star),市佔率高、增長率高;狗(Dog),市佔率低、增長率低;現金牛(Cash Cow)市佔率高、增長率低;問題兒童(Problem Children),市佔率低、增長率高)

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載