› 選擇地區
三藩市
紐約
洛杉磯
其他美國地區
香港 台灣 北美
 
2013年10月16日

中馬勝食蟹 - 左丁山

十月九日晚在沙田馬會會所跑雙邊馬,正在凱旋廳刨馬之際,忽然被人拍膊頭,抬頭一望,乃食家李純恩與梁家權是也,呢兩位係馬場稀客,點解會走嚟沙田馬會?哦,原來呢兩位尖嘴食評家係應邀到會所二樓「銀袋」西餐廳試嚐星加坡特色食品咖喱蝦、胡椒蟹與肉骨茶,俾下意見。「銀袋」在十月十日至二十日有星加坡特色食品推廣,以上三款菜式乃主打項目,事先搵一啲識飲識食兼食得辣嘅食評家試吓是否對辦。
左丁山一來盡量少吃蝦蟹,二來不能食辣,李梁兩位要拖左丁山落去試味,梗係唔制啦,跑馬望贏錢,蝦蟹留番佢兩位自己食可也。呢晚有說冼為堅先生隻「友誼大使」過江到快活谷挑戰美國會所盃,跑一千八百米,左丁山有理冇理,立即主動捧場,學孫柏文口頭禪,一注獨贏第三場9號「友誼大使」,有韋達嘅2號「紅駿」成為大熱門孭飛,啱晒,隻馬嘅賠率愈嚟愈好分,由6.4倍跌到落7.8倍,最後有隻5號「勁友福」着綠燈落飛到2.7倍,成為大熱門,益咗9號分多啲。騎騎,9號一條直路如入無人之境,大勝兩個半馬位,左丁山當然笑到見牙唔見眼,冼先生善有善報吖嘛,捐二千萬元俾中文大學辦好文史哲,極為難得,抵佢捧盃嘅,隻馬贏得輕鬆,相信還有頭馬在手,下次再捧場。
急忙WhatsApp冼先生恭喜之餘,心情輕鬆,落去二樓搵李純恩與梁家權,睇吓佢地食成點,原來公關大姐大亦已趕到,食完咖喱蝦再吃黑白胡椒蟹,輔以炸饅頭,佢地話啲辣汁無以尚之,斯里蘭卡大蟹大把肉,食得過癮之至,讚不絕口,話到星加坡亦未必搵到咁大隻靚蟹,係要左丁山試一試,點敢制呀,唯有落荒而逃,走番上凱旋廳,剛好係第五場,二話不說就一注獨贏買5號「頌友」,馬主旋風團體有信興老闆蒙德揚在內,梗係要捧啦,果然又係輕易取勝,唉,有早知嘅話,預先買一口過關獨贏二穿三,三場9搭五場5,就肥過斯里蘭卡大蟹咯!各位會員朋友鍾意食辣食蝦及蟹嘅,不妨盡快向銀袋卜位一試,左丁山就得個恨字啫。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載