› 選擇地區
三藩市
紐約
洛杉磯
其他美國地區
香港 台灣 北美
 
2018年03月04日

欲與天公比高 - 左丁山

Getty Images(Getty Images)

中國曆法都幾耐人尋味,今年係戊戌年,不少人都講到1898(120年前)戊戌維新或戊戌變法失敗,影響滿清命運,戊戌維新後第12年,就發生辛亥革命,滿清皇朝消失了。1958戊戌年,毛澤東搞大躍進運動,炮打金門,一場大躍進,令中國經濟破產,大饑荒隨之而來,不少中國人餓死。呢兩個戊戌年都幾邪,今年戊戌一開始箒,就傳出中共修憲,廢除鄧小平生前為防止毛澤東一人獨大情況再度出現,規定國家主席副主席不能任職超過兩屆共十年嘅規定,並將習近平思想寫入憲法,然後將遵守憲法,尊重憲法提升至最高政治水平。
好多評論家都認為修憲係為習近平連續掌權二三十年鋪路。習主席生於1953,今年65歲,五年後如像胡錦濤及之前嘅江澤民,遵照舊憲法,自動下台退休,應為鄧小平遺願樹立優良榜樣,但習有雄心野心,或者覺得普京能,為何習不能?普京係西方人,跟住俄羅斯憲法規矩玩,做完兩屆就落台唔做總統,轉做總理。跟住又再競選成為總統,技術上完全冇錯,雖則完全違反法律精神。習近平話對中國文化有自信喎,中國文化傳統就係重視人治,輕視制度,邊個當權,邊個話晒事,於是習先生都費事好似普京咁做大戲嘞,直情學足已故委內瑞拉總統查韋斯,修改憲法,廢除任期限制,一於速選速任,一於做到老。以習主席目前健康狀況,做多十年、十五年、二十年至85歲,有乜出奇呀,但如今五十歲嘅精壯幹部就無望接棒咯,五年前嘅五十出頭人選如孫政才,已經下馬,如胡春華,已坐埋一邊,跟住嗰一批,還有誰人敢做出頭鳥?
啲忠字派好快就出咗來打鑼打鼓感讚中央英明,中國需要長期穩定,需要領導人有貫切性,將一帶一路推行到底,將統一台灣在任內完成歷史任務!
左丁山在中午飯局問一位北京觀察家有乜意見,佢話從時序睇,習派欲快刀斬亂麻,19屆三中全會(2月26至28日)未開始前,已宣佈修憲,並且湊巧地將楊晶滯職,觀察一年,威脅團派不要輕舉妄動,另一方面,即時接管安邦,對太子黨示威(安邦有陳毅之子,朱鎔基之子勢力),地方諸侯重量級如孫政才較早時已打殘,故此估計中共內部已冇乜人敢公然反對,他日人大必然蓋上一個橡皮圖章。戊戌年有大事發生,習近平一錘定音,起碼至少做到2028年,睇吓是否會超鄧趕毛,欲與天公比高嘞!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載