› 選擇地區
三藩市
紐約
洛杉磯
其他美國地區
香港 台灣 北美
 
2018年03月19日

DQ區諾軒 - 左丁山

今次立法會補選,原來泛民四席之中,有兩席畀建制派搶咗,即建築測量界功能組別及九龍西直選,於是全港都認為泛民慘敗,建制派更乘勢追擊,不怕再做醜人,搵一名「普通市民」入稟法院,要求DQ港島新科議員區諾軒。呢件事由工聯會前議員王國興「幫助」市民入稟,可謂出招兇狠,係要將泛民踩落地下。如果法院真係DQ咗區諾軒,港島議員席位由第二高票陳家珮補上還是要擇日再補選?一位港島選民話:畀陳家珮代替嘅話,選民條氣會好唔順,一定發動同路人上街示威!
不過陳家珮之「保媽」(有別於保爺)葉劉淑儀就好想陳家珮補中喎。三月十一日立法會補選有結果之日,澳門新賭王呂志和之嘉華集團在萬豪酒店黃昏時間設新春酒會招待各界,以新賭王今時今日稱雄澳門,銀河娛樂市值逾3,000億元嘅地位,各界人士當然踴躍出席,逼爆萬豪酒店宴會廳,地產記者、編輯齊齊亮相。一位地產記者見到葉劉淑儀到場,說話風騷,好多人都聽到,大意係:要DQ區諾軒,呢啲人唔可以畀得佢入立法會搞搞震,陳家珮仲年紀輕,大把前途,請大家支持佢。
眾人聽到葉劉淑儀如此口氣,唔通唱反調咩,只好講吓應酬說話,在如此場合,不適宜與自以為好有影響力嘅人士來一次即興辯論也。跟住有一位測量師L匆匆到場,佢對老友講:「去咗外地出差,返唔切嚟投票,今朝先返到,好彩Tony(謝偉銓)贏咗啫,唔駛畀泛民阻頭阻勢。」但跟住又同其他行家講:「乜司馬文咁多票㗎,佢都未試過拉票,好似唔識競選基本動作咁嘅,擺個嘜頭就有二千三百票,Tony咁努力,只係贏唔夠600票,下次大家要小心喎!」司馬文根本難以殺入傳統華人建築師測量師圈子,今次得2,345票,足以令老一輩震驚!另一位唔識競選嘅係姚松炎,深水埗老友從未見過姚松炎在街頭出現,對手鄭泳舜就一早「掃街」掃咗幾個月,姚松炎盲目相信社交網頁(一位年青旺角選民話姚松炎網頁做得最好),有鬼用咩,好多以前投票畀民協嘅公屋老選民,肯睇網頁先至奇。呢次補選,民建聯工聯會等之人力物力遠勝泛民,街頭宣傳盡是建制派世界,左丁山在灣仔與沙田,一味見到陳家珮與鄧家彪嘅宣傳,真係未見過區諾軒與范國威嘅海報,佢兩位仍然當選,其實幾難得!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載