› 選擇地區
三藩市
紐約
洛杉磯
其他美國地區
香港 台灣 北美
 
2019年01月19日

酒店順德菜 - 左丁山

資料圖片

年近歲晚,好幾間酒家午市晚市都見人頭湧湧,團年飯宴要及早預訂。不過小G有一個小秘密,佢話:「時代廣場食通天最易訂位,星期六晚食肆都唔見有好多人;第二度冇位就去銅鑼灣時代廣場最啱。」依老友曾智華嘅覓食經驗智慧,呢啲地方最好留做後備,人頭湧湧插針不入嘅地方先至係首選,首選最麻煩之處就係成日要在門口排隊,罰企起碼15至30分鐘,例如新年過後嘅中環Brass Spoon,中午12時過後,想入去食碗越南牛河粉呀,前面起碼有二三十人排隊,距離不遠嘅「三多」,門口更有三四十人之多(呢間本地麵食,便宜過Brass Spoon幾成,顧客成份不相同),到士丹利街一樂想食碗燒鵝瀨粉,更加唔係講笑。

上星期四嘅老友(真係年紀老嘅朋友,起碼有三位年過80)定期飯局,輪到左丁山做東,去邊度好呢?想搵間新店搞新意思,卒之諗到,呢次唔去中總七樓俱樂部、賽馬車會、上海總會、浙江軒、喜萬年、利苑或星月居,而係去海洋公園萬豪酒店之「南海小館」,吃順德菜。上次林建岳介紹呢間酒店(麗新集團中標興建,海洋公園係地主,交予萬豪營運),試食德川牛扒,知道夠晒正宗,Peter又說南海小館有好嘢食,叫左丁山得閒去試試。呢次因利乘便,請埋班老友移玉步到海洋公園大門入口外面嘅酒店,左丁山從萬宜大廈出發去坐地鐵,到金鐘坐南港島綫,在海洋公園站B出口行過去,到達南海小館,只係20分鐘,快到自己都唔信,因為平時由中環坐地鐵去灣仔,再行路到喜萬年,起碼20分鐘過外也。以為自己最先到達,點知有五位仁兄已經坐低咗,異口同聲咁講:「想唔到咁快就嚟到。」陳會長隨後而至,話從跑馬地住宅開車嚟,十零分鐘就到,快過上中環。

食乜嘢呢,經理已寫好菜單,簡單嘅瘦肉粉葛湯,胡椒煎魚頭、家鄉煎蓮藕餅、蜜味叉燒,魚湯魚滑浸冬瓜乾,吃到人人讚不絕口,甜品蜂蜜黑糖糕,地產F臨時加上薑汁撞奶,大家感到鮮味十足,即刻問部長:「師傅係順德人?」部長話:「順德菜式係由一位順德來香港嘅師傅炮製,其他菜式有本地師傅。」輪到下次做東嘅賓架N話要encore,訂位,點知部長話對唔住,已有人訂咗房!自己係酒家董事嘅賓架H急不及待,即刻訂一個月後嘅飯局。地產F也訂星期日與家人來飲茶。地產F每次家庭飲茶都係大陣仗要足兩圍,星期日中午唔係咁易搵到地方㗎!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載