› 選擇地區
三藩市
紐約
洛杉磯
其他美國地區
香港 台灣 北美
 
2019年03月02日

廣場協議歪論 - 左丁山

資料圖片

中美談判傳出好消息,令上海深圳股市暴漲,自低位反彈超過20%,技術上進入牛市,而且成交一日超過一萬億元人民幣,配合大市暢旺,看來牛市來了。唔係話潑冷水,中國股市特徵係有一個短暫「大時代」,吸引散戶瘋狂入市,但如果唔識得炒一轉就獲利回吐,暫停與中國股票談戀愛,好容易會變成「十年一覺揚州夢,贏得青樓薄倖名」,隨時床頭全盡呀。

中國股市升,人民幣亦漲,特朗普要求中國保持人民幣整體穩定,意思係人民幣不要貶值,最好升值,於是最近人民幣升到破6.7。人民幣升值有考究,陰謀論又起,一啲中國金融分析師不時講番1985年之巴黎廣場協議(Plaza Accord),指美國強迫日圓升值,日本同意,於是埋下日本三十幾年經濟苦難喎,中國千祈唔好重蹈覆轍呀。

中國評論員視「廣場協議」為美國毒計,害死日本,中國必須吸收教訓,講來講去,講過無數次,於是一啲天真人士信以為真,到現在還是有人信。日前一個中午飯局,一位日本通老友見人民幣升值,又提出「廣場協議」,中國人民幣不能長期升值。想當年,中資林、左丁山、楊社長等一齊夾份炒馬克英鎊日圓,睇好美元,誰知有一晚賺到笑,預備平倉之時,揸車入紅磡隧道,大塞車,當時冇手提電話,諗住到咗酒店餐廳就去打電話,獲利回吐。哎吔吔,一過完隧道,B B機響起,傳來美元大跌,日圓急升消息,馬克亦然,一剎那間,炒外匯由賺變蝕,皆拜當晚(香港時間)歐美日簽訂「廣場協議」之賜。當時損失幾慘,但亦有好處,左丁山從此戒炒外匯,以後再無炒匯輸錢。講番正事,日圓升值之後,日本人其實係炒家心態,利用強日圓到美國亂買地產,亂炒本國樓市,令東京房地產總值超過加州與夏威夷加埋總和,股市更一路癲上去,1989年12月尾暴升至三萬八千九百點。日本人如此炒賣瘋狂?係美國人策劃嘅咩,還是日本人心態瘋狂?後來大爆煲又關人乜事?三十年後,中國大款咪又一樣,海航與安邦到紐約猛咁買甲級酒店商廈,態度根本同當年日本人一樣。日本之下滑其實係經濟體系追不上時代變遷,有手機新科技而不肯向日本境外消費推銷,電腦科技完全輸晒,蘋果iPhone一出,新力、聲寶、東芝、Panasonic電子產品全線崩圍,根本與日圓升值無關!及至亞馬遜、Google等企業發展起來之後,日本整體產業根本捱打,中國評論員散播「廣場協議」害死日本之說,純屬歪理歪論。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載