› 選擇地區
三藩市
紐約
洛杉磯
其他美國地區
香港 台灣 北美
 
2019年04月27日

媽祖寄言受命於天 - 左丁山

台灣《蘋果日報》

郭台銘宣佈參加國民黨總統候選人初選,一時間人氣大盛,民望高漲,遠超蔡英文、賴清德,似乎大有機會與佢位老友記特朗普看齊,登上總統寶座。到時佢可以同特朗普講電話,大家一句Donald,一句Terry,好不過癮,習近平看在眼裏,會唔會怒火中燒呢?Terry在大陸嘅工廠,僱用近一百萬工人,大客戶係美國蘋果手機,既然有咁龐大投資在大陸,習近平想搞吓Terry,話都冇咁易,手中握有大量把柄,Terry如何應付呀?中共唔慣搞政經分離呢一套,鍾意株連同一系統,如果台灣人真係選咗了Terry Gou做總統,台商好易變成北京經濟俘虜,反而朱立倫或王金平仲可以同北京扭吓計。

特朗普治國,自把自為,但穆勒報告顯示,美國有不少人願意緊守原則,不盲目追隨服從特朗普命令,例如司法部人員情願辭職,都唔肯聽話,去炒穆勒魷魚,表明美國政治傳統與守法比聽命令更重要。但郭台銘做咗翻版特朗普之後,台灣是否有如此人才為信守政治原則而唔聽郭台銘命令?中國人性格四海如一,怕好難咯,擦鞋保職位梗係緊要過守規矩啦,昔日蔣介石及蔣經國主政初期,行威權政治,但內閣還有俞大維、俞國華、李國鼎、孫運璿、錢復、錢思亮、錢純等人輔助,皆有學問,有操守,忠心盡力建設台灣之輩。今日台灣,還有誰人可比?

郭台銘雖縱橫商界,海內外揚名,但從他的「媽祖報夢,關公顯靈」的言論看,他內心還是一個迷信的傳統中國人,自己有政治野心(講得好聽是有救民之心),但不敢直說,反而取巧,說是媽祖寄夢,不知媽祖會不會對佢講:「大陸大軍壓境,將有一場超級颱風橫掃台灣海峽,把解放軍艦艇埋葬於海底?」這種受命於天,捨我其誰的心態,在21世紀的台灣還有市場的話,台灣人枉讀書了。

不知是否綠營文宣出動了,郭台銘「媽祖寄夢」之說已有台灣網上笑話發放:那晚郭台銘睡覺夢見媽祖,媽祖沒說甚麼,一覺醒來後,發覺「脖子酸,膝蓋腫,頭很痛,綜合感覺是酸腫痛,參詳其中微言大義,就是媽祖叫他『選總統』!」郭台銘選總統,最不缺的就是銀紙,大可高價聘任兩三打文膽為他打網絡文宣戰,第一炮不如大捧特捧黃袍加身論,造成「斯人不出,如蒼生何」的大氣氛!祝台灣人好運。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載