› 選擇地區
三藩市
紐約
洛杉磯
其他美國地區
香港 台灣 北美
 
2019年06月04日

杯弓蛇影 - 左丁山

互聯網

報載一名投資銀行家,未夠50歲,駕車行經中環灣仔繞道,在隧道內突然昏迷,汽車亂咁行,卒之撞壆停低,銀行家送院不治,據說並非因交通意外而死,而係可能有隱疾突然發作之故。

因有隱疾而在跑步、行山、駕車而突然死亡嘅,近年有增加趨勢,唔知係唔係與心臟血管病有關。中風係香港前幾名殺手病,現今港人大多營養豐富,並非不足,而是過多,引致血壓高、血管堵塞,係普通不過之事。左丁山十年前在中環行街途中,突覺氣喘、呼吸有問題,心中發毛,幸好中六合彩咁夠運,皇后大道中人群之中,竟然見到家庭醫生H,於是衝上前捉住佢訴苦,醫生H立即帶左丁山上中建大廈醫務所做心電圖,發覺係心律不正常,即刻介紹去萬邦大廈睇心臟科專家醫生K,醫生K診斷係有問題,初發,不算太嚴重,食吓藥先,以後要點點點……

上星期又到惡佬明行街氣喘,第一時間撲去搵醫生H,呢次比較嚴重,次日做顯影掃描,醫生H一睇結果,二話不說就要惡佬明去醫院睇專家L,三日後就做微創通波仔手術,手術一日後就出院,可以繼續到馬場賭馬。後與公關大姐大講起,佢話死黨老友十幾年前遇上危疾,做手術電療等等之後,到馬來西亞睇中醫吃藥補身,十餘年來都仲好活潑,點解要去咁遠?原來有一啲中藥材,香港係禁止使用嘅,馬來西亞就可以。馬來西亞中醫「買一送一」,送一張中藥方畀大姐大嘅朋友,係用來清治血管堵塞物體嘅,大姐大話有人食過有奇效,故此畀左丁山試試,藥物普通,不貴,人人負擔得起。

前幾日,又係行街時候,撞到來自美國嘅生物科技投資專家A,佢原來因投資事宜,返來香港見投資基金,但知道基金資本來源係中國大陸之後,十分猶豫,分分鐘白行一趟咯;問佢:「有人肯投資都唔要?」專家A話:「中美貿易戰展開後,美國監管投資資金來源睇得好緊,如果係中資,會問百幾條問題,好煩,我好彩移民早,又唔多識普通話,美國人冇乜懷疑我。有一啲大陸朋友科學家,好易畀人睇實,千祈唔好有行動可疑之處呀!」美國吓吓防備中國科學界在美國偷取最新科技資料,幾乎係杯弓蛇影,專家A話現時在美國做活躍中資投資者,一定成為監視目標,華裔切忌過勇,免惹禍上身!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載