› 選擇地區
三藩市
紐約
洛杉磯
其他美國地區
香港 台灣 北美
 
2019年06月16日

示威精英 - 左丁山

六四燭光晚會之後又有六九大遊行,用內地網上文章的形容詞嚟講,就係「世界震驚」。六月九日有幾多市民上街唔緊要,總之係人多,全世界都認為人多,理得警方話24萬,雷鼎鳴話19萬9千5百,以及民陣宣稱有103萬人吖。沙田陳太拎住拐杖去遊行,在灣仔克街出去插隊,平時香港人行路怱忙,唔會理會不良於行嘅人士,但呢日沙田陳太親眼所見,有人願意扶佢去插隊,有人幫助別人跨欄,總之大家表現出前所未見嘅禮貌與互助,難怪資深傳媒人鄭明仁寫出「美麗的香港人」,在危急關頭,香港人係有禮有節有序咁樣,為爭免於恐懼的自由而發聲。

各位參加遊行嘅老友匯報,人人估總遊行人數超過五十萬,林鄭月娥又考第一,爭取到受最多人數反對的特首的名銜,威過扶持佢上台嘅董伯伯,梁振英當然自嘆不如。為地方領導者,午夜夢迴,會唔會撫心自問:「點解幾十萬人上街反對我嘅呢?」還是冷笑一聲,情願相信有七十三萬人簽名支持我呢?

之後又話有八十三萬人簽名撐修例(前日又話增加到九十三萬人),建制派果真好嘢,提供一個不知如何核實,又冇上街見到嘅83萬個簽名,令北京振振有詞話香港主流民意撐送中。沙田陳太等人見到就眼火爆,佢嘅表弟話:「吳秋北,黃英豪等有種的,就發動十萬人遊行撐修例,睇吓可唔可以坐滿維園足球場!」吳秋北邊度敢呀,到時又只係得啲愛字派出現,咪冇晒面?到時搵雷鼎鳴負責數人頭,且看本事如何!點講都好,特朗普話咗:「我未見過有咁多人遊行,有一百萬人。」以後全世界都會講及香港有一百萬人遊行嘅嘞。

餐飲M匯報,當晚有大量人流在皇后大道東近太古三期散隊,佢自己亦都身水身汗走入Grappa's食意大利餐,點知唔係親眼見都唔會信,餐廳坐滿人,盡是白衣客,街外排隊等枱嘅,又係白衣人,有白衣食客離開時,回頭向餐廳內致意拍掌,眾人回報以掌聲,餐飲M自然亦是身穿白衣,對此情此景甚為感動,話香港人情意盡在不言中。粗略大膽啲講,反送中的人士大都年輕兼高薪,是目前香港GDP增長動力,贊成者多是老退等收福利金人士,林鄭月娥自命精英,但大多數精英反對佢,點搞呀餐飲M係上世紀六十年代港大畢業生,係真正讀書精英!或者當林鄭對住嗰類支持者嘅時候,就一定可以自稱為好打得精英啦。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載