› 選擇地區
三藩市
紐約
洛杉磯
其他美國地區
香港 台灣 北美
 
2019年10月22日

借九成 - 左丁山

世姪B與左丁山在中環天橋相遇,話想參加網上號召到重慶大廈示威,抗議南亞裔襲擊及重傷岑子杰,左丁山叫佢千萬唔好,因涉及種族衝突,事件可大可小,到時示威者作出歧視行動,叫出歧視口號,咁就會畀藍絲作大新聞,國際上亦唔會諒解,保加利亞對英格蘭場足球賽就是前車可鑒。

世姪B當時冇話唔去示威,但到咗晚上,佢來短訊:「太高興,同女朋友食完晚飯,佢話趁政府推出首置可以借九成,叫我為結婚籌謀,一於買樓借足九成,女朋友亦係做銀行,兩個人薪水加埋可以應付壓力測試,橫掂我地唔夠首期,今勻可以借九成,機會難逢也,你認為點睇?」

於是打電話畀佢:「你想點呀?」世姪B話:「女朋友都有示威遊行過,但我地唔係衝衝子,呢次有機會買樓借九成,佢驚住我地是但一個在街頭被捕,壞了結婚計劃好事,所以唔去示威咯。你亦講得啱,我銀行都有南亞裔同事,佢地同胞斬人,點可以扯埋佢地落水,要分開嚟講。」

有人話林鄭月娥之首置借九成,根本係陽謀,利誘和理非有能力買樓一族退出示威行列,以後二三十年為了供樓,行動不會過激。無論陰謀陽謀,香港係有不少28至32歲年青專業人士,如會計師嫁醫生,律師娶銀行主任,工程師娶建築師等等,兩人月薪加埋起碼在七萬八萬以上,或係十幾萬,不靠父幹,絕對有能力供樓,但冇足夠五成首期(現時金管局限制),借九成喎,根本係為呢班人度身定做,去年年底陳茂波曾有此議,即刻畀林鄭否決,到現在,林鄭唔會記得自己講過乜嘅嘞,一於派糖利誘和理非唔好上街先。施政報告一出,美聯地產股價立即上揚,就係呢種心理預期嘅反映。講到賣樓時間之精準,長實真係第一,可以揀正施政報告推出後開賣新樓盤,問你服未,超人之眼光,係零舍高啲,譬如長實以天價(400億以上)賣出中環中心,交易完成後,中環甲級商廈價格有跌冇升,又逢林鄭心急,搞到香港亂晒龍,高昂租金支持唔住嘞,中環中心新業主唯有短炒變長揸,證明超人能夠摸頂出貨,凡人炒家就摸頂入貨。

左丁山知道世姪B想趁機買現樓做其首置業主,走去問地產專家王震宇點睇,佢大潑冷水:「因住負資產,你問我,我睇樓價會繼續下跌,唔好咁快跌落林鄭陷阱!」於是又講番畀世姪B聽,請佢自行考慮清楚。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載