› 選擇地區
三藩市
紐約
洛杉磯
其他美國地區
香港 台灣 北美
 
2019年12月02日

旅發局程鼎一頂硬上 - 左丁山

香港旅遊業目前係乜環境,唔駛多講,總之係得過捱字,捱得幾耐,要視乎業界股東財力而定,目前有錢在手嘅朋友,可以周圍享受吓,舒服到極。譬如編輯F於不久之前冧阿媽,買咗半島酒店一個「套餐」,每日房租1900元,阿媽歡喜到暈,試問去年今日有乜可能,半島酒店從來昂貴兼難訂房。廣播K家住灣仔,屋企裝修,搬去維園附近一間酒店暫住,每日270大元,每十日續租一次,抵過住劏房。喜歡飲食嘅老友T打電話嚟報喜:「喂,以前Icon自助餐,三個月卜都未必卜得到,依家三日前打電話就得嘞,你快啲去試吓。」Icon係理工大學酒店,位置優越,開業以來,成為理大搖錢樹,不過酒店在紅隧旁邊一帶,放咗咁多催淚彈,都係避開吓先。

呢個時候就任旅發局行政總幹事(相等於CEO)直情得係千斤擔子肩上挑,要搵大隻猛男,頂住頂住。呢位新CEO就係中大聯合書院師弟程鼎一,洋名阿Dane。程師弟尊翁,已故名作家程靖宇(本名綏楚),筆名「今聖嘆」,曾在崇基學院教歷史,後來成為專欄作家,1950及1960年代,名聞一時。資深報人鄭明仁對今聖嘆之風流逸事,知得好清楚,話程鼎一慣咗奉母(日本美女)之命,到舞廳尋父,故此程鼎一自少已對香港夜生活,見慣見熟。佢自中大畢業之後,加入國泰航空,曾派駐台北、東京、北京、雪梨,負責Sales & Marketing,後來又做過國泰公共事務部總經理,幾年前離開國泰,到恒隆地產跟老上司陳南祿,啱啱今年六月左右離開咗,點知七月就遇上旅發局招聘行政總幹事,代替幸運兒劉鎮漢(今年八月離職,梗係夠運啦,走得快,好世界),獵頭族搵阿Dane應徵,既有如此背景,做旅發局實在係天作之合,於是順利接棒。

劉鎮漢老兄就話夠運走得快啫,程鼎一呢個時候接任,豈非走入高溫廚房,點可能為香港旅遊界起死回生?阿Dane在傳媒飯局上講到,點都要做番好香港盛事節目嘅,唔能夠坐以待斃。佢上任後,頻頻到不同外國商會解釋香港基本上好安全,遊客唔怕嚟,趁機會享受吓價廉物美之香港酒店服務及餐飲。香港依然有不同活動吸引遊客,例如年初一(2020年1月25日星期六)至年初四假期,有新春嘉年華;在2020年除夕倒數;有18米高聖誕樹豎立於皇后像廣場等等。希望能為本港增添節日歡樂氣氛。阿Dane話2003年沙士期間佢與旅遊業議會主席袁家齊坐在半島酒店吃早餐,整個大堂只得佢兩位食客,今日情況還不致於此,既然見慣風浪,程鼎一一於唔怕頂硬上,為香港旅遊業再創新天地。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載