› 選擇地區
三藩市
紐約
洛杉磯
其他美國地區
香港 台灣 北美
 
2019年12月11日

泰國外勞 - 左丁山

Tourism Authority of Thailand網站圖片(互聯網)

喺泰國出席出殯葬禮儀式,遇到一位英國、一位美國傳教士,知道左丁山來自香港,特別提出香港Be Water一連串有關問題,因時間所限,難以一一作答,又有一位豪門富三代及一位自稱係華僑嘅潮州大兄詢問香港如何如何……可見香港之反送中運動已經變成世界性討論題目,香港及香港人在亞洲有頗高地位,逆權運動之影響及吸引到之世界性注目,遠非茂名市反興建火葬場可比。

故人遺體下葬地Nakhon Pathom有一宏偉佛塔,泰文稱為Phra Pathom Chedi(佛統大塔,位於那宏柏頌府),相傳在公元前一百九十年左右興建,到1870年先至正式開光,號稱千年巨塔,佛塔全身金色,係當地最多遊客嘅景點,葬禮完成後,回程途中,故人之子D君特地帶我地去佛塔「打卡」,拍照。記得40幾年前讀碩士時,曾與同學特登搭巴士前往一遊,估唔到再臨此地,已經係白髮滿頭。此塔高120米,圓周235米,全泰國最高,不少香港遊客曾到此一遊。

汽車加油時,油站女士為汽車洗抹車頭玻璃,左丁山對D君講:「我在香港入油已唔記得有呢項服務咯!」D君話:「到現在還是泰國汽油站之標準增值服務。不過呢個油站嘅工人,我一睇就知道佢地唔係泰國人,聽佢地講泰文有緬甸口音,應該係移民勞工!」乜泰國都有移民勞工?D君說:「泰國失業率低至無可最低,少於2%,到處請唔到工人,泰國人已經唔肯做傭工、油站呢類低薪工作,絕大部份係由寮國、緬甸、柬埔寨工人做。我屋企傭工就係寮國人,好難請到泰傭嘅嘞。油站啲緬甸人應該有日薪300銖。已經好開心,可以有錢匯返鄉下!」泰國經濟可能真係唔錯,泰銖兌美元持續上升,遊客又多,雖是佛教國家,近十年為了營造氣氛,吸引遊客,大酒店紛紛重視聖誕裝飾,例如今次下榻於Anantara就在12月3日請來皇室公主(即泰皇直系親屬)光臨主持聖誕亮燈儀式,大堂內之聖誕樹十分漂亮,天氣又配合聖誕氣氛喎,有兩個晚上,曼谷涼風陣陣,如香港秋天,令街上行人覺得十分舒服。

醒起曼谷有好多樓盤在香港推銷,吸引香港人,於是問D君市道如何,佢話:「講到地產,你可能識得多過我,但我由細到大從來未見過曼谷地價大跌,有錢人總是買地買樓,買完又買,總之係不斷升值。」D君話泰國有三大財團不斷買地,即象牌啤酒集團(Chang,愛華頓球衣上大字),CP(卜蜂集團)及中央(Central)集團。有一個笑話,一位超級闊太一味買樓,見到鍾意嘅就要買,叫律師去出價,不問價錢,有一次佢睇到一間花園別墅歡喜到極,叫律師立即做嘢,律師話:「買唔到嘅。」闊太話:「出夠錢畀個業主。」律師話:「業主就係阿太你呀,一年前買咗嘅嘞!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載