› 選擇地區
三藩市
紐約
洛杉磯
其他美國地區
香港 台灣 北美
 
2020年02月18日

廣東可徵私產抗疫 - 左丁山

肥仔K在新年期間往大阪、神戶、奈良、京都遊覽一星期,點知香港學校封校直至另行通知,於是又帶住老婆仔女去東京自駕遊,其間收到不少朋友同學短訊,催促佢買口罩,於是立即周圍搵,如葉一南在專欄所述,在東京搵得辛苦。日本自從有奈良旅遊巴司機中招後,日本人爭相買口罩,市區內難得一見,但好彩因為自駕遊,到東京郊外小鎮,仍可以一箱箱咁買,肥仔K買咗四箱往郵局空郵回港,郵局職員話:「點解咁多中國人嚟寄口罩?」肥仔K唯有苦笑。

返到嚟,好唔得閒,朋友同學分批來到分口罩,又驚「口罩不可露眼」,分別用不透明手抽環保袋裝得密實。個個攞完口罩都呻驚住用完就買唔到,現在日本出現有二百幾宗確診,多過香港,日本仲會有口罩賣咩。

學生豪(依家係助理工程師嘞,以後得稱工程豪)有中學同學在印尼有人脈關係,居然有辦法自印尼運咗幾萬個口罩到香港,部份捐畀NGO,部份叫親友認額,一晚就被搶購一空,遲覆電郵者冇份,每個賣五元,學生豪分得兩箱返屋企,媽咪好高興,因為見到網上有廣告賣印尼口罩,一盒五十個,售498元!

政府買口罩,訂5300萬個,目前只收到400萬個,反而香港人各師各法,各顯神通,透過私人關係,運咗不少口罩回港應急。私人公司如屈臣氏直情免費派15萬個口罩㖭,醫管局淒涼到口罩存貨不足,有勞新鴻基地產捐獻15萬個,想來范鴻齡主席都覺得好冇癮,林鄭咬牙切齒話有口罩等物資供應醫管局,咁啲物資去咗邊呀,澳門人話要信「一誠」,香港人信林鄭一成再打五折都會死人!

有如此政府,就會委任葉劉呢類人做行政會議成員,此人語不驚人死不休,講完就畀政府否認,都係要講,可能係佢以為香港特區政府係內地政府咁威權啩。2月11日,廣東省人大常委會緊急立法,即時授權廣州市政府和深圳市政府,必要時可依法緊急徵用私人財產抗疫!咁樣私人產權何在?改革開放後,以為內地私人產權有啲保障,依家藉抗疫之名,隨時徵用,唔怪得內地人一發達就立即千方百計走資移民,點都係要去美國澳洲買房地產先,衰衰地都要離開香港買番兩層樓!

市民要警告葉劉及林鄭,你哋兩位諗都唔好諗呢個方法,向廣東偷師呀,否則香港未畀武肺搞彎就畀呢類緊急法搞死!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載