› 選擇地區
三藩市
紐約
洛杉磯
其他美國地區
香港 台灣 北美
 
2020年04月15日

戴口罩 - 左丁山

法新社

朋友轉發一段不知來源的英文短訊,讓人看了哈哈大笑,之後不禁苦笑,用廣東話繙譯如下:「2020果然真係鼠年,人人日日匿埋,出穴只為醫肚,拖食物回巢以備缺糧,有人行埋嚟我地就走夾唔唞!」

鼠年把人類變為老鼠模式,一味stay home,要與別人保持距離,美國國家過敏和傳染病研究所主任福西話握手已是歷史行為,香港人出街唔戴口罩會畀人眼超超,如過街老鼠。庚子年真係咁邪?大家都知道120年前庚子年有庚子拳亂,八國聯軍入北京,傷盡滿清元氣,十一年後1911年就滅亡;1960年庚子年係中共黨史記載之所謂「三年困難時期」(即1959至1961年由大躍進導至之三年大饑荒之中間一年),全中國人口比1959年減少咗1000萬,點解突然間少咗一千萬,冇詳細解釋,左丁山還記得當年祖母與家姐在鄉下捱餓,媽媽日日到茶餐廳買麵包皮回家浸糖水,到天台曬乾,每夠二三十斤就孭住兩大袋返鄉下俾嫲嫲家姐食,左丁山當初唔知,話麵包皮難以入口,畀媽媽用藤條打,後來知道實況,曾大哭一場。

對上一個庚子年,左丁山最大之回憶就係麵包皮乾,其餘不甚了了。今年庚子年,來了一個Covid-19,雖然科學界認為真正來源仍有待證實,但多數認為係來自動物傳人,動物之中最大可能性就是福鼠、蝙蝠是也,又有云蛇鼠一窩,世衞總幹事譚德塞生於1965年乙巳年,屬蛇,都算幾邪。

唔講玄妙之事,講番科學,德國柏林、慕尼黑及英國劍橋嘅科學家在4月1日發表研究文章,刊登於Nature,內容指Covid-19病毒會在人類喉部迅速繁殖,速度遠高於沙士病毒,在喉嚨存活5日達至高峰,唾液(口水)有極大傳染性,德國專家因而指出防病毒傳染之主要方法就是阻止飛沫(droplets)傳播,講簡單啲,就是戴口罩,一向認為戴口罩冇乜用嘅世衞最近已經轉口風話戴口罩有助阻止病毒傳播,可能就係一早已知悉德國研究結果。西方醫生一向唔認為戴口罩有用,最主張狂洗手,但最近,相信西方國家已開始加強推廣人民戴口罩。Covid-19之難以阻止,在於有隱形病人傳染,帶菌者未發病前不知不覺已連累他人確診,故此戴口罩之最大用途係防止帶菌人口噴飛沫,而唔係戴咗口罩可以一定阻截病毒入侵。

現在歐美名人明星已興起戴口罩之風,不過係戴Gucci口罩!意大利人苦中作樂,傳出黑色幽默笑話:「世上只有意大利人做得到出,醫生穿阿曼尼袍,病人用法拉利呼吸機,人民戴Gucci口罩,洗手液用Bvlgari,入地獄都零舍有型!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載