› 選擇地區
三藩市
紐約
洛杉磯
其他美國地區
香港 台灣 北美
 
2020年04月30日

買瓷碟 - 左丁山

路透社

陸羽常客賓架S說冇得在陸羽見面,不如去置地廣場唐人館吃餐午飯,點解去唐人館(China Tang)?佢話:「呢間平時幾貴,我都覺得肉赤。但在此非常時期,網上訂位有七折,北京填鴨每隻只售198元,你話抵唔抵?」如此價錢,當然係筍盤,於是同佢湊夠四個人去食填鴨及其他小菜及點心,賓架S仲帶埋支紅酒嚟,因為𠵱家China Tang唔收開瓶費,益食家飲酒。左丁山一睇,紅酒招牌係「羅富齊」,嘩,駛唔駛咁大陣仗?賓架S笑言:「唔好以為我咁豪,呢支羅富齊唔係我偶像畢明寫嘅羅富齊。」飲落就知道唔同,但仍然好正,配填鴨,幾啱味。

多謝賓架S之餘,醒起校友會主席Y,佢講過一月時帶外母到沙田凱悅之「沙田18」食填鴨,外母唔多領情,有意見,於是WhatsApp佢:「喂,可以帶外母嚟唐人館食填鴨補番數,平夾靚。」主席Y在農曆年後成家人去咗紐西蘭旅遊,因香港唔駛返工,兒女唔駛返學,玩咗近一個月,風聞香港可能封關,急忙回港,再隔一個月先至重出中環見老友食飯。佢一聽到,就立即上網訂位,於是益咗左丁山一個星期內兩次到唐人館食填鴨,一去到未坐低就畀隔籬枱叫住:「師兄,乜咁啱?」一望,原來係財經大報總編輯A姐,與任生唐生嘅御用公關公司老闆湯馬士一齊。此日唐人館每四人一張枱,看似全場滿座,可見減價促銷好有用。

主席搵埋校友F及今年畢業嘅小師妹R嚟吃填鴨,左丁山關心師妹就業,問佢搵到工作未,師妹R話慘咯,好想喊!原來佢素來成績優秀,有五成以上機會攞一級榮譽,去年專心申請到聯合國做實習(intern),過五關斬六將之後,竟然獲得聘請,開心到震,預備畢業試後就去紐約返工,於是其他職位一概冇申請。點知突來肺炎疫情,令全世界封關鎖國,美國禁止外人入境,聯合國在三月初就通知師妹R一切offer撤銷,師妹R為之暈得一陣陣,本來還有一個機會係與新亞同學到牛津大學作暑期交流,又因為英國疫情而取消。師妹反問:「師兄,有冇工呀?」唉,此時此刻,企業炒魷多過請人,點搞?校友F安慰師妹R:「我1998年畢業碰啱亞洲金融風暴,搵工淒慘故事一匹布咁長,唔駛驚㗎,一於唱校歌:艱險我奮進,困乏我多情。」師妹R苦笑:「係呀,手空空無一物,路遙遙無止境,唔知捱到幾時。」左丁山笑佢:「咁啦,以你嘅師兄曾國衛為偶像,加入民建聯,幫建制派搞立法會選舉,有前途㗎!」師妹R醒目到極,對住左丁山講:「去淘寶用280元人民幣買個習主席瓷碟相片先!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載