› 選擇地區
三藩市
紐約
洛杉磯
其他美國地區
香港 台灣 北美
 
2020年06月01日

跟風炒股 - 左丁山

馬主F又試約食翅,呢次係去九龍福臨門(九福),話要傾吓時事。左丁山依時去到,一坐低,就見到馬主C、馬主H、馬主L等在座,大家距離有兩三米,保持社交距離,於是大家行埋傾吓賽馬先,馬主C公子隻馬在5月24日勝出,大家一齊恭喜佢,馬主H話5月31日出三隻馬,其中一隻可能一出即勝,但應該冇乜分頭,一於記住先,此文見稿之日,已知勝負。馬主F話乜嚟到九福食飯,碰到咁多馬友,下次不如再嚟九福咯。

坐番低,馬主F在5月22日炒短線,料不到全日恒指一沉不起,累佢輸咗三十幾萬,好肉痛,好彩在5月24日刨到兩隻熱門馬,瞓身買二串一獨贏,贏番二十幾萬,就係「及時行樂」射落「共創繽紛」嘞。收番咁多,5月25日26日又嚟又炒過,呢次痛定思痛,諗住北京全力推行港版國安法,香港出動董建華,建制派、商界及高官全力唱好,皆曰國安法可增香港安定繁榮,如果股市再跌,中央咪好冇面?循此思路,在上星期一早上見恒指再跌400點,即時入市買期指,收市時果然恒指由跌轉升,心念一動,揸多一日先,於是在星期二撈番一大筆。在九福食蟹黃翅,慶祝自己有諗頭,估中攤路。

呢樣思維,九七前有朋友試過,當時有人因精讀馬克思資本論而反共,九六年間堅決認為北京要面,唔會畀股市樓市冧,大舉買股票,果然賺到魚翅撈飯,可惜貪勝不知輸,唔記得「Buy on rumour, sell on fact」(有謠言就入貨,證明係事實就出貨)嘅炒股道理,1997年7月1日後,還要賀回歸繼續增持,就咁迎上九七金融風暴,猝不及防,走避不及,畀經紀追孖展,最後要以「個人財務重整」收場,係一個慘痛教訓。以此故事話畀馬主F聽,佢話:「我唔會嘅,我已對長遠投資冇信心,揸住隻滙控十幾年收息,依家輸到眼光光,仲有乜好講,所以我集中短炒,一日鮮最多,長期就係揸貨三日,隱形國家隊即使退場,我亦走得切!」如果相信九七前嘅理論,隱形國家隊會頂住個市唔好再跌,到六月尾國安法成為事實之後,貴客自理咯。

九福嘅蟹黃翅即叫即做,美味之極,馬主F話自己窮人出身,現在已到退休之年,只管三件事,美食、賽馬與炒股,除此之外,對一切事冇興趣,例如佢討厭示威,但見到年青人難買納米樓,又覺得佢哋上街有一定道理:「目前呢種環境造就我炒期指搵銀,故此香港日益貧富懸殊,社會更不穩定。」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載