› 選擇地區
三藩市
紐約
洛杉磯
其他美國地區
香港 台灣 北美
 
2020年06月13日

管控警暴港美不同 - 左丁山

(互聯網)

香港警察去年對付示威者,與今年美國警察應付示威,手法大同小異,射TG,射橡膠子彈。不過有一點截然不同,就係香港特區政府怕咗警察,小小員佐級警員都可以發言攻擊政務司司長而不受紀律處分,已可見一斑,故此香港警察對警暴之說絕不接受,不負責任,監警會無權調查,特區政府視若無睹。美國式民主制度下,殺死人嘅警察被控「二級謀殺」,公民團體票控警察暴力,在紐約州水牛城,應急警察小隊在街上向前巡邏時,有一名75歲白人老翁擋路,警察大力把他推倒,跌至地上,警察不理,直行直過,影片公開後,民眾譁然,兩名警察停職,57名警員「離開」應急小隊,紐約州州長要求水牛城市長展開調查。

民主制度下,警權會被濫用,但同時有法律制衡,並非警務處長可以一手遮天,受當權者庇護,堅拒獨立調查的。如褚簡寧(Michael Chugani)在他的EJ專欄所言,美國制度有自我治療糾正功能,自我療傷。香港呢?由上而下的壓迫,令人不安,可走的便移民,留下來不服氣的,認為攬炒無大礙,社會難得長久穩定。

不過現在各國移民收緊,要走不是易事,移民顧問D對左丁山講:「查詢移民個案係急劇增加,但真係動身走人嘅,比較少見。始終,冇一定銀両,好多地方都唔去得,譬如不少人講塞浦路斯、馬爾他,可以攞歐盟護照,動輒要五十萬美元以上,香港人爭輸晒畀內地人,內地有些人一味係咁用錢買護照,狠勁過我地好多!」內地人把口就非常愛國,但護照就非常媚外,口不對心,已成常態。

悶悶哋之日,賓架C請去食牛扒,牛扒就一般啫,聽賓架P講藍絲客就趣味十足。佢話手上有不同華人客戶、內地客、東南亞客、海歸派客、本地廠商客,樣樣齊,幾乎人人都係藍絲,個個話愛國,支持國安法立法。賓架C睇佣份上,人地講乜就講乜,完全唔駁嘴,只係偶然問一句:「又買美元英鎊呀?」客戶答:「仔女要去讀書呀,幫佢地買間屋!」唔抵得,問多句:「有冇考北大清華呀?」客戶輕微色變答:「佢地在英國讀寄宿學校嘅!」賓架C又唔敢笑,只能順勢講:「你啲仔女真係叻!」賓架C見得呢啲情況太多,知道無謂再追問點解你咁愛國,銀紙、仔女就向英美澳加流出。其實有錢藍絲/華僑大多如此,在東南亞/香港搵到錢,死都唔走,仔女在外國讀書多,死都唔肯返上海北京住,於是最好就係做「愛國華僑」,應咗一句「留美是生活!」同賓架C拜拜之後,行到IFC又遇到一位世姪女,金融界新進也,佢話幾驚國安法有咗之後香港唔知變成點。左丁山大膽話:「我識你爹哋,佢係深藍,你怕咩喎?」世姪女話:「我地成家都有英國護照,爸爸班朋友個個藍,偏偏全部外國護照,存錢在外資銀行。我知道個個口不對心,所以我本來係淺藍,依家變咗淺黃!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載