› 選擇地區
三藩市
紐約
洛杉磯
其他美國地區
香港 台灣 北美
 
2020年06月18日

香島剃楊潤雄眼眉 - 左丁山

去年社運高峰期,網上有一段Video,係傳統名校聖瑪利書院學生在學校操場內組成一隊樂隊,有小提琴、大提琴、長笛等等好手十幾人,即興演奏「願榮光歸香港」,學校各層課室有學生站出來齊聲高唱,場面感人,羅范椒芬或者睇到眼火爆,但一位新亞師姐Y係五十幾年前畢業生,就話感動到流眼淚,支持小師妹。沙田陳太嘅表妹有三個女,都係由聖瑪利小學讀到中學畢業嘅,據佢講,聖瑪利嘅功課壓力好大,學生讀書少啲都唔掂,勢估唔到一曲「願榮光歸香港」可以感召到咁多聖瑪利女仔(不知是否違反校令)齊聲合唱。

現在教育局長楊潤雄講到明,以後全港學生唔准在學校內唱「榮光」及政治性歌曲,但假如聖瑪利女生在操場齊唱「歌唱祖國」、「東方紅」,楊局長唔知批唔批准呢?一句講晒,在學校學薄熙來唱紅歌就冇反對,唱「榮光」及「慈祥鵬過聖誕」(黃霑名作)就要趕出校?

楊局長揸住港澳辦中聯辦雞毛當令箭,呢排威到不得了,對全港學校發號施令,睇落係要提早表忠,以防根正紅苗紅嘅副局長蔡若蓮下屆踢走佢。蔡若蓮老早係中聯辦愛將,安插佢在教育局早有盤算,熱身五年之後,由蔡若蓮做教育局局長,好合中聯辦用人邏輯。楊潤雄一早送兒子讀國際學校,到澳洲留學,等兒子唔駛接受愛國教育,點算得係「絕對忠誠」呀。

楊局長目前還可威威,但想唔到公開剃佢眼眉嘅竟然係老牌愛國學校香島中學(著名校友有成思危、張學明、黃定光、吳亮星、黃國健、苗僑偉、戚美珍、葉國華、屈穎妍;異類校友有李怡、林榮基)。九龍塘香島中學一名教師早前未有禁止學生於音樂科考試演奏「榮光」,備受校方壓力,卒不獲續約,一群近百名香島學生6月12日在校外發起人鏈活動,聲援該教師,並要求校方解釋,楊局長話過唔准學生拉人鏈,唔准唱「榮光」,香島學生即刻剃佢眼眉!香島要炒呢位女教師,高舉愛國旗幟,當然係大石砸死蟹,殊不知學生亦有發言權利,一位蔡同學在網上講:「她不單止是音樂老師,也是我人生中其中一個恩師,教我十二年,從來不談政治,唱榮光不關老師的事,難道有人唱粗口歌又要老師負責?好唔合理。」呢位蔡同學有所不知了,愛國學校要與愛黨同步,愛國就是聽黨話,跟黨走,容不下有選擇唱乜歌的自由,也容不下教師讓學生有選擇的自由,講完!不過左丁山還是佩服呢班學生膽敢令香島冇面,令楊潤雄氣頂的勇氣!港澳辦中聯辦唔知要不要愛國學校斬斷甚麼黑手呢?不如炒晒成個香島校董會!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載