› 選擇地區
三藩市
紐約
洛杉磯
其他美國地區
香港 台灣 北美
 
2020年07月04日

零售業過份膨脹 - 左丁山

肥仔K一家五口在端午節及七月一日假期,都曾到又一城商場行街搵食,佢話目測商場有好多人,每間食肆都好好生意,幾間熱門嘅,在門口有人龍,看似香港人報復式消費,在家裏悶得久了,要到商場血拼一番。但吃過午飯到商場名店行一轉,卻又覺啲名店水盡鵝飛,門堪羅雀,搵個人入內買嘢都見唔到。肥仔K問左丁山:「點解釋呢個看似矛盾嘅現象,人多排隊食飯,但冇人買嘢?」

諗深一層,其中並無矛盾,香港人鍾意食,已世界聞名,並且因為住屋面積細小,冇法子請客,約埋親戚朋友食飯,唔去公眾餐廳去邊喎。昔年左丁山做銀行見習生之時,美國經濟獨大,美資銀行派海外僱員來港(expat),還未係VP(副總裁)級數,已經可以住渣甸山,左丁山之頂頭上司住在軒德蓀道一間屋,目測有三千呎,巨型客飯廳,如何利用呢?呢位印度人聰明絕頂,掏自己腰包請一個家廚,每星期邀請大客戶之第二代(即三十零歲之公子千金)到渣甸山大宅吃晚飯,拉關係,果然同客戶建立極友好私人關係,幾年後辭職自立門戶,就有一啲公子千金投資佢間私募基金公司。我地班本地見習生,家住幾百呎,點有資格邀請客戶回家吃飯拉關係呀,頂多只能入公數請客戶CFO到希爾頓、文華酒店,太過公式化,好難埋身建立私人關係(按:當年嗰班富二代,現在已全是城中名人富豪)。

今日租金昂貴,呢條橋怕行唔通,大家拼命往商場食肆擠進去,乃人之常情。在疫情之下,前程難卜,食飯錢如非餐餐蟹黃翅,貴極有個譜,無損家庭理財之健康程度,但如果去購物喎,香港人大多乜都有齊,冇乜需要,買新衫新鞋喎,幾百呎住所仲有冇空位擺呀?此乃香港人之最現實問題,屋企不能當係貨倉也。現時零售疲弱與本港居民消費力無大關係,主要係過往十幾年零售商過份注重大陸客,拼命擴充開分店,算係overtrading(即膨脹超乎資本儲備)一類,一旦客源不至,生意即刻周轉有問題,養和醫院都要伸大手板向政府攞錢保就業,顯然係overtrading之典型,唔好彩遇上疫情,內地病人不來,於是硬晒軚!即使疫情過後,大陸客重來,零售業都要步步為營,收縮規模,方可避過財困。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載