› 選擇地區
三藩市
紐約
洛杉磯
其他美國地區
香港 台灣 北美
 
2020年07月14日

罵李國能 - 左丁山

同大集團公關吃午飯,談及大企業如何面對國安法,講講吓,問佢位公子小一去邊間學校,佢話會入蔡繼有,令佢喜出望外,因為事先好多朋友都話入蔡繼有比較困難也。後來有其他朋友話佢知,蔡繼有今年多收學生,一啲以前只能做備取生嘅,今年都入到,有乜原因呢?大公關話想落現時學生大執位,不少學生家長互相流轉消息,國際學校多國際學生離港,大名校聖保羅男女、男拔、女拔有學生離港,於是轉校插班機會大增,小一多收新生無妨。

有錢人、富裕中產以搵錢為上,多屬藍絲,藍絲子女多在名校就讀,呢個時候要去英國讀寄宿學校嘅,亦以藍絲子弟為多數,如屈才女潘才女大罵香港教育唔掂,佢兩位嘅千金早已在英國讀書,已非新聞,至於中產黃絲,有膽量有辦法移民外國嘅,當然帶埋仔女走,於是弄成國際學校、直資學校學生洗牌。

香港國際學校收生之黃金時期已過,呢兩年來香港開辦嘅國際學校,幾難收夠學生,一來本地有錢送子女讀國際學校嘅家長,一係黃絲移民,二係藍絲鍾意仔女去英國接受教育,三係外國expat以後因為國安法,人數縮減,舊人會走,新人來港數目縮減,連帶expat學童亦少咗,冇靚校舍嘅國際學校仲邊有競爭力,國安法之43條及38條足以令跨國企業深思,香港政治風險增加,少派人來港為妙。

與大公關拜拜之後,一位外國友人B來短訊問:「聽講有位北京官員批評李國能,係乜嘢一回事,我地好尊重尊敬李國能嘅,聽到佢畀北京鬧,我地班人有啲驚。」佢嗰班人即是一班西人行政人員,Andrew Li聲名極響,法律界人人尊敬尊重,點解畀北京鬧,搵報紙查咗一輪,搵到前港澳辦副主任徐澤,本屬過氣小官,突然間走出嚟回應李國能早前講,指定法官有違司法獨立。徐澤指稱,李國能建立了香港法院憲法性管轄權,違憲審查權,營造司法獨大,把行政長官主導體制扭曲為三權分立!香港人講司法獨立,對李國能、馬道立視為權威(唔通係梁愛詩譚惠珠咩),今前有田飛龍副教授批評馬道立,跟住過氣小官徐澤罵李國能,可見黨委指揮法庭之中國體制,行將在香港實施。解釋番畀朋友B聽,佢回短訊:「Time to consider going home!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載