› 選擇地區
三藩市
紐約
洛杉磯
其他美國地區
香港 台灣 北美
 
2013年10月30日

肯食M記就要娶? - 曾志豪

「肯捱麥記?娶得過」,網絡熱傳。
故事主旨:港女都唔肯同男人食平嘢,如果遇到一個肯食麥記的女人,娶得過。
這個測試,其實有無料到?
原來香港已經奢侈到,食M記要用「肯捱」來形容。一個餐動輒二十多元,一啲唔失禮。如果想終極測試,應該改為「肯捱波仔叮飯!娶得過!」一個波仔十幾蚊有交易;或者「肯去7仔食關東煮!娶得過!」
身邊女人說,關鍵不是M記還是N記,而是為甚麼要去食?譬如因為工作關係,無時間覓食,她們不介意食快餐。
但如果大把時間,並非無錢,但男人居然只肯去M記,女人便會拒絕,因為覺得男人無誠意。
這種測試,有「仇富」心態,似乎去M記才是好女人,去四季食飯的,便是壞女人。且慢,14巴港女可能經常喺M記出沒,你唔係想娶佢吧?
肯去M記食飯,只能表示,對食的要求不高;她可能咬住個包,但要求你去米蘭站買包包呢?
這種測試沒完沒了,「肯去公廁的女人娶得過」,「肯着剪牌衫的女人娶得過」,「肯陪你玩高達的女人娶得過」,「肯逼巴士嘅女人娶得過」、「肯唔結婚的女人娶得過」、「肯隆胸嘅女人娶得過」……
一句到尾,「肯蝕底的女人娶得過」。對,嫁給這種心態的男人,真係蝕底晒。
我諗無乜女人嘅擇偶條件係「佢肯同我捱公屋食大牌檔」,女人當然希望可以找一個令自己進步的男人。今天住公屋,明天住居屋,也是一種上升。
相反男人太無志氣,居然開到口,要搵一個肯同自己食M記的女人。
女性追求進步,男人反而想原地踏步。
理想的男人,係搵到一個肯同你捱嘅女人,但你有能力,令女人唔使再捱。

曾志豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載